31.41c
Երեվան
ուրբ, հլս 31
Հայաստանի մէջ «Քորոնա» ժահրի տարածումը կանխարգիլելու միջոցառումներով պայմանաւորուած՝ 24 մարտէն մէկ շաբաթով պիտի դադրեցուի սրճարաններու, ճաշարաններու, որոշ շինարարական աշխատանքներու եւ շարք մը ձեռնարկութիւններու գործունեութիւնը: «Արմէնբրես»-ի փոխանցմամբ՝ այս մասին «Ֆեյսպուք»-ի իր էջի ուղիղ եթերի ժամանակ ըսած է ՀՀ վարչապետ Նիկոլ Փաշինեանը:
«Մեզի անհրաժեշտ է որոշակի աւելի խիստ սահմանափակումներ մտցնել եւ աւելի խիստ ձեւով մօտենալ արգելքներուն: Վաղուընէ պիտի արգիլուին բոլոր տեսակի ճաշարաններու եւ սրճարաններու գործունէութիւնը, բացառութիւն կ'ընենք առաքման ծառայութիւններու համար: Որոշակի շինարարական աշխատանքներ կը դադրին: Կը դադրի նաեւ կարի արտադրական ձեռնարկութիւններու, թեթեւ արդիւնաբերութեան շարք մը ճիւղերու գործունէութիւնը»,- ըսած է Փաշինեանը:
Վարչապետը նշած է, որ պիտի շարունակուի սնունդի արտադրութիւնը, մթերային խանութները պիտի աշխատին սովորական ռեժիմով, իսկ Պարէտատունը պիտի հրապարակէ թոյլատրելի գործունէութեան ցուցակը:
Նիկոլ Փաշինեանը քաղաքացիները յորդորեց հնարաւորինս սահմանափակել տեղաշարժը եւ տունէն դուրս գալ միայն խիստ անհրաժեշտութեան պարագային:
