24.19c
Երեվան
չրք, հլս 22
Ռուսաստանի Դաշնութեան նախագահի մամլոյ խօսնակ Տմիթրի Պեսկովը յայտարարած է, որ Հաւաքական անվտանգութեան պայմանագրի կազմակերպութեան գլխաւոր քարտուղարի հարցը չէ լուծուած:
Ինչպէս կը հաղորդէ «Արմէնբրես»-ը, վկայակոչելով ՌԻԱ նովոսթին, Տմիթրի Պեսկովը այդ մասին ըսած է լրագրողներու հետ զրոյցի ժամանակ՝ անդրադառնալով հարցին՝ լուծուա՞ծ է ՀԱՊԿ գլխաւոր քարտուղարի նշանակման հարցը:
«Ոչ, հարցը չէ լուծուած: Բնականաբար, ԵԱՏՄ անդամ երկիրներու ղեկավարներու զրոյցի ընթացքին օրակարգէն դուրս այդ հարցի քննարկումը նախաձեռնած է Ալեքսանտր Լուքաշենկոն: Սա նորմալ ձեւաչափ է, իւրաքանչիւր երկրի ղեկավար ազատ է բարձրացնել այն հարցերը, որոնք անհրաժեշտ կը համարէ»,- ըսած է Պեսկովը:
Անոր խօսքով՝ այդ պահուն բանակցութիւններու սեղանի շուրջ բոլորը ներկայ չեն եղած: «Աշխատանքները պիտի շարունակուին»,- ընդգծած է ՌԴ նախագահի մամուլի խօսնակը:
Եւրասիական տնտեսական բարձրագոյն խորհրդի նիստէն ետք լրագրողներու հետ զրոյցի ժամանակ Պելառուսի նախագահ Ալեքսանտր Լուքաշենկոն յայտարարած էր, որ ՀԱՊԿ գլխաւոր քարտուղարի հարցը լուծուած է, եւ այդ պաշտօնին պիտի նշանակուի Պելառուսի ներկայացուցիչը: Պելառուսի նախագահի յայտարարութիւնը հերքած էր ՀՀ վարչապետի մամլոյ խօսնակ Արման Եղոյեանը՝ նշելով, որ ՀԱՊԿ գլխաւոր քարտուղարի հարցը չէ լուծուած:
