27.97c
Երեվան
չրք, հնս 10
Վարչապետ Սաատ Հարիրիի հրաժարականով սկիզբ առած Լիբանանի քաղաքական տագնապը կը շարունակուի: Այս առումով Պաապտայի նախագահական պալատին մէջ երկրի նախագահ զօր. Միշէլ Աուն ընդունած է երկրի քաղաքական գլխաւոր կողմերու ներկայացուցիչները:
Պաապտայի նախագահական պալատ այցելողներու շարքին եղած է նաեւ ՀՅԴ Կեդրոնական Կոմիտէի ներկայացուցիչ եւ հայկական երեսփոխանական պլոքի ղեկավար երեսփոխան Յակոբ Բագրատունին:
Բագրատունի, որ հանդիպումէն անմիջապէս ետք խօսած է լրագրողներուն ըսած է, որ երկրին մէջ տիրող քաղաքական տագնապը երկար պիտի չտեւէ: Ան նաեւ խօսած է յառաջիկայ տարի կայացուելիք երեսփոխանական ընտրութեանց մասին նկատել տալով, որ նախագահ Աունէն հաւաստիացումներ ստացած է, որ այդ ընտրութիւններ պիտի կատարուին ճիշդ ժամանակին:
Ստորեւ «Արեւելք»ի ընթեցողներուն կը նըրկայացնենք Լիբանանի ՀՅԴ օրկան «Ազդակ» այս մասին այսօր առաւօտ ներկայացուցած լրատուութիւնը:
Լիբանանեան քաղաքական ղեկավարներու հետ հանրապետութեան նախագահի նախաձեռնած հանդիպումներու ծիրին մէջ, ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ յետմիջօրէին այցելեց նախագահական պալատ:
Հանրապետութեան նախագահ զօր. Միշել Աունի հետ հանդիպելէ ետք Յ. Բագրատունի շեշտեց, որ ներկայիս համբերատար զգուշաւորութիւնը տիրական է, որովհետեւ նման հարցեր ժամանակի կը կարօտին:
«Տագնապը քաղաքական է, եւ մենք կարիքը ունինք իմանալու վարչապետ Սաատ Հարիրիի հրաժարականին իսկական պատճառները», ըսաւ ան:
Երեսփոխան Բագրատունի հաստատեց, որ երեսփոխանական ընտրութիւնները պիտի կատարուին ճշդուած թուականին: «Ճիշդ է, որ կայ տագնապ մը, սակայն նախագահ Աուն ունի սահմանադրական իրաւասութիւններ, եւ այդ տագնապը երկարատեւ պիտի չըլլայ», ընդգծեց երեսփոխան Բագրատունի:
