6.06c
Երեվան
երկ, ապր 13
Անցնող նոյեմբերին Ատրպէյճանի կողմէ գերեվարուած Վիգէն Իւլճէքեանի առողջական վիճակին մասին նոր տեղեկութիւններ յայտնուած են։
Այս մասին «Արեւելք» տեղեկացաւ «Ասպարէզ» պարբերականէն։
Աղբիւրը մասնաւորապէս կը գրէ, թէ նոյեմբեր 10-ին Շուշիի մերձակայքը ատրպէյճանական զօրքերու կողմէ գերեվարուած լիբանանահայ՝ Վիգէն Իւլճեքեան հիւանդանոց փոխադրուած է: Այս մասին տեղեկացուցած են Վիգէնի 18-ամեայ դուստրը՝ Քրիսթինէն եւ մայրը՝ Պիաթրիսը: Անոնք պատմած են, Վիգէնի հետ իրենց վերջին հեռաձայնային խօսակցութեան մասին, երբ զինք բանտէն փոխադրած են հիւանդանոց:
Աղբիւրը գրած է, թէ Քրիսթինէն վերջին վեց ամիսներու ընթացքին ստիպուած եղած է արագ մեծնալ: Ան կը խօսի հանգիստ ու հասուն եւ դարձած է ձայնը այն հայ ընտանիքին, որ կը փափաքի վերադարձնել որդին, եղբայրը ու հայրը, որու միակ յանցանքը Հայաստանի մէջ աւելի լաւ ապագայի մը երազանքները եղած էր:
Այս երազանքները սակայն փշրուեցան, երբ Ատրպէյճան անսպասելի պատերազմ սկսաւ Արցախի դէմ: Չիմանալով, որ քաղաքը արդէն գրաւուած է, հրադադարի մասին համաձայնագիրի յաջորդ օրը, 10 նոյեմբեր, 2020-ին, Վիգէն Մարալ Նաճարեանին հետ գացած էր Շուշի՝ իրերը հիւրանոցէն վերցնելու, նախքան քաղաքը Ատրպէյճանին յանձնուիլը: Ատրպէյճանական զօրքերը կանգնեցուցած են զանոնք եւ հանրակառքով տարած Պաքու` բազմաթիւ այլ հայ գերիներու, քաղաքացիական անձերու եւ զինուորներու հետ միասին: Մարալ Նաճարեան ազատ արձակուեցաւ մարտ 2021-ին, իսկ Վիգէնը կը շարունակէ մնալ գերութեան մէջ, ուր անոր դէմ քրէական գործ յարուցուած է Ատրպէյճանի կողմէ:
Միջազգային Կարմիր խաչի ներկայացուցիչներուն միայն փետրուար 2021-ին թոյլատրուած է այցելել Վիգէնը բանտին մէջ: ԿԽՄԿ-ը նպաստած է Վիգէնի եւ Պէյրութ գտնուող անոր ընտանիքի պարբերաբար հաղորդակցութեան եւ նամակներու փոխանակման: Ապրիլին, հինգ ամիս գերեվարութենէ ետք, առաջին անգամ թոյլատրած են Վիգէնին, որ զանգէ ընտանիքին: Ան ըսած է անոնց, որ իր հետ լաւ կը վերաբերին, եւ որ իր փաստաթուղթերը կը վերանայուին երեք ամսուայ ընթացքին զինք ազատ արձակելու համար։
Սակայն ըստ աղբիւրին, այս յոյսերը կրկին փարատած են, երբ 5 մայիսին, Ատրպէյճանի պետական անվտանգութեան ծառայութիւնը յայտարարած է, որ Վիգէն Իւլճեքեանի հետաքննութիւնը աւարտած է եւ անոր գործը ուղարկուած է դատարան: Զինք կը մեղադրեն «ահաբեկչութեան», «որպէս վարձկան, ռազմական հակամարտութեան մասնակցելու» եւ «ատրպէյճանական սահմանը ապօրինի հատելու» մէջ։
