14.61c
Երեվան
հնգ, հնս 04
Պուրճ Համուտի քաղաքապետարանի դաշտը 31 մայիսին դարձաւ հայ համայնքի համախմբման կեդրոնը, ուր ՀՄԸՄ-ի կազմակերպած աւանդական մայիսեան փառատօնով նշուեցաւ Հայաստանի Հանրապետութեան անկախութիւնը։ Հազարաւոր մասնակիցներ՝ սկաուտներ, մարզիկներ, աշակերտներ եւ միութենականներ, իրենց ներկայութեամբ վերահաստատեցին ազգային արժէքներուն, հայապահպանութեան առաքելութեան եւ հայրենիքի նկատմամբ նուիրումի ուխտը։
Մեծի Տանն Կիլիկիոյ Արամ Ա. կաթողիկոսի հովանաւորութեամբ եւ ՀՄԸՄ-ի Լիբանանի Շրջանային վարչութեան կազմակերպութեամբ տեղի ունեցած փառատօնը նուիրուած էր Մայիս 28-ի անկախութեան ոգիին։ Ելոյթ ունեցողները ընդգծեցին Հայաստանի Ա. Հանրապետութեան պատմական նշանակութիւնը, ազգային դաստիարակութեան կարեւորութիւնը եւ ներկայ մարտահրաւէրներուն դիմաց միասնական մնալու անհրաժեշտութիւնը։
Փառատօնի ընթացքին ներկայացուեցան հայոց պատմութեան կարեւոր դրուագներ, յատկապէս Ցեղասպանութիւնը, Մայիս 28-ի անկախութիւնը եւ ազգային պայքարի տարբեր հանգրուաններ։ Սկաուտներն ու մասնակիցները նաեւ հանդիսաւոր ուխտով վերահաստատեցին իրենց յանձնառութիւնը՝ շարունակելու հայութեան պայքարը եւ ծառայելու ազգին ու հայրենիքին։
Հանդիսութիւնը եզրափակուեցաւ հայրենասիրական երգերով, տողանցքով եւ այն պատգամով, որ ՀՄԸՄ-ը կը շարունակէ մնալ ազգային ինքնութեան, դաստիարակութեան եւ հայապահպանման ամուր հենասիւն մը։
