27.69c
Երեվան
երկ, հնս 29
27 Մայիսին կառավարութեան ընդունելութիւններու տան մէջ տեղի ունեցաւ Հայաստան Համահայկական հիմնադրամի հոգաբարձուներու խորհուրդի եւ տեղական մարմիններու 25րդ միացեալ նիստը, զոր վարեց խորհուրդի նախագահ, Հայաստանի նախագահ Սերժ Սարգսեան:
Հիմնադրամի գործադիր տնօրէն Արա Վարդանեան լրագրողներուն հետ ունեցած զրոյցին ընթացքին յայտնած է, որ Հայաստան» Համահայկական հիմնադրամի «Մարաթոն–2016»ի հասոյթը պիտի տրամադրուի Արցախի քառօրեայ պատերազմի քանդումները վերացնելուն, եթէ այլ առաջարկներ չներկայացուին:
Պատասխանելով այն հարցումին, թէ որքա՛ն գումար կը պահանջուի ծրագիրի իրագործման համար՝ Արա Վարդանեան նշած է, որ Լեռնային Ղարաբաղի կառավարութիւնը սկսած է հաշիւներու, սակայն տակաւին յստակ չէ, թէ որքա՛ն գումար անհրաժեշտ է: «Օժանդակութիւնը պէտք է լինի բազմաշերտ՝ սկսած դեղորայքի առաքումից մինչեւ տների վերանորոգում, ընտանիքներին աջակցութեան տրամադրում: Այն ընտանիքներում, որտեղ եղել են զոհուածներ, նրանց աւելի մեծ օգնութիւն կը տրամադրուի: Աջակցութեան ձեւերը դեռ կոնկրետացման փուլում են։ Քառօրեայ պատերազմի ավերածութիւններից բացի, Արցախում կան բազմաթիւ խնդիրներ՝ լինի ջրատարների կառուցում, դպրոցների շինարարութիւն եւ այլն: Պարզապէս այս տարի աւելի շատ կենտրոնանալու ենք այն շրջանների վրայ, որոնք աւելի շատ են վնասուել այդ օրերի ընթացքում», նշած է ան:
Ըստ օրակարգին՝ Հայաստան համահայկական հիմնադրամի գործադիր տնօրէն Արա Վարդանեան ներկայացուցած է 2015 թուականին կատարուած աշխատանքներուն վերաբերեալ հիմնադրամին գործադիր վարչութեան հաշուետուութիւնը:
Օրակարգի յաջորդ հարցը՝ Հայաստան Համահայկական հիմնադրամի «Մարաթոն-2016»ի նպատակաուղղուածութեան մասին էր. այդ մասին զեկուցած է Լեռնային Ղարաբաղի նախագահ Բակօ Սահակեան, որ Ղարաբաղի ժողովուրդին եւ իր անունով խորին երախտագիտութիւն յայտնած է ամբողջ հայ ժողովուրդին, Հայաստանին եւ Սփիւռքին՝ Հայաստանի նախագահին գլխաւորութեամբ, Ատրպէյճանի կողմէ սանձազերծուած պատերազմի ծանր օրերուն Ղարաբաղին սատար կանգնելու համար: Ան ընդգծած է, որ հայ ազգը ունի իւրայատուկ ունակութիւն՝ համախմբուելու ճակատագրական պահերուն եւ լուծում տալու համազգային կարեւորագոյն խնդիրներուն: Ան առաջարկած է «Հեռուստամարաթոն-2016»ի ծրագիրին մէջ ներառնել ապրիլեան պատերազմէն տուժած բնակավայրերուն վերականգնումը: Առաջարկը ընդունուած է եւ ընդգրկուած 2016 թուականի հեռուստամարաթոնի ծրագիրի մէջ:Խորհուրդը միաձայնութեամբ հաստատած է «Մարաթոն-2016»ի նպատակաուղղուածութեան մասին զեկոյցը:
