-0.91c
Երեվան
շբթ, դկտ 20
Իրաքի Զախոյի Սուրբ Մարիամ Աստուածածին Եկեղեցւոյ մէջ, օրերս, Ս. Թադէոս եւ Բարթողիմէոս Առաքեալներու տօնին առիթով կատարուած է երեկոյեան ժամերգութիւն, ապա՝ Թեմի Առաջնորդ Գերշ. Տ. Օշական Եպս. Կիւլկիւլեանի ձեռամբ տեղի ունեցած է «Հայոց Մեծ դարձ» եւ «Սրբոց Նահատակաց» սրբապատկերներու օծման արարողութիւնը։
Եղելութեան մասին «Արեւելք» իմացաւ Թեմի պաշտօնական էջէն։
Ստորեւ տրուած հակիրճ հաղորդագրութիւնը՝
Շաբաթ, Նոյեմբեր 29-ին, Հայոց Առաջին Լուսաւորիչներ Թադէոս և Բարթողիմէոս Առաքեալներու տօնին առիթով, Իրաքի Հայոց Թեմի Առաջնորդ Գերշ. Տ. Օշական Եպս. Կիւլկիւլեանի հանդիսապետութեամբ Զախոյի Սուրբ Մարիամ Աստուածածին Եկեղեցւոյ մէջ կատարուեցաւ երեկոյեան ժամերգութիւն, ապա՝ Սրբազան Հօր ձեռամբ տեղի ունեցաւ «Հայոց Մեծ դարձ» եւ «Սրբոց Նահատակաց» սրբապատկերներու օծման արարողութիւնը։
Արարողութեան ներկայ էին Էրպիլի Սուրբ Խաչ Եկեղեցւոյ հոգեւոր հովիւ Արժ. Տ. Արթուն քհն. Խալաթեանը, Տհոքի Սուրբ Ներսէս Շնորհալի Եկեղեցւոյ հոգեւոր հովիւ Արժ. Տ. Մասիս քհն. Շահինեանը, Պաղտատի Սուրբ Գրիգոր Լուսաւորիչ Առաջնորդանիստ Եկեղեցւոյ մէջ սպասաւորող հոգեւորականներ Տէր Սեպուհ քհն. Պաղտասարեանը եւ Տէր Առէն քհն. Մարտիրոսեանը ինչպէս նաեւ հիւսիսային շրջանի տարբեր հայ համայնքներէն ժամանած թաղական խորհուրդներու ատենապետերն ու անդամները, սրբապատկերներու նուիրատուն եւ բարեպաշտ հաւատացեալ ժողովուրդը։ Վերջաւորութեան, Սրբազանը իր շնորհակալութիւնը յայտնեց բարերարին եւ ներկայ հաւաքին՝ պատգամելով, որ սրբապատկերներու խորհուրդին հետեւելով միշտ բարձր պահեն մեր քրիստոնէական կոչումը եւ առաքելութիւնը։
Ապա եկեղեցւոյ սրահին մէջ մատուցուեցաւ միասնական սիրոյ ճաշ։
Իսկ Կիրակի, Նոյեմբերի 30-ին, Հանդիսապետութեամբ Թեմիս բարեջան Առաջնորդ Գերաշնորհ Տ. Օշական եպս. Կիւլկիւլեանի, Ս. Պատարագ մատուցուեցաւ Զախոյի Սուրբ Մարիամ Աստուածածին եկեղեցւոյ մէջ։
Պատարագը մատուցեց և յաւուր պատշաճի քարոզեց Արժ. Տ. Առեն քհն. Մարտիրոսեանը։
