Հայաստանի եւ Ատրպէյճանի սահմանին ռազմական միջադէպերու քանակի աճը կասկածի տակ կը դնէ երկու երկիրներու միջեւ բանակցութիւններու վերսկսման հարցը, գրած է ֆրանսական Le Monde պարբերականը` նկատելով, որ Յունիսին կայացած արտահերթ խորհրդարանական ընտրութիւններէն ետք Նիկոլ Փաշինեանի իշխանութեան պահպանումը հանգստացուցած է Պաքուն, քանի որ Ատրպէյճանի իշխանութիւնները կը վախնային ընդդիմութեան` իշխանութեան վերադարձէն:
«Ընդդիմութիւնը կը սպառնար չեղարկել 2020 թուականի 9 Նոյեմբերի եռակողմ յայտարարութիւնը, որով աւարտած է 44-օրեայ պատերազմը»,-գրած է լրագրող Էմանուէլ Կրինշփանը` Հայաստանի մայրաքաղաք Երեւանէն 50 քմ հարաւ` Նախիջեւանի մատոյցներուն մօտ տեղի ունեցած բախումներուն:
«Չորեքշաբթի, 14 Յուլիսին, փոխհրաձգութեան հետեւանքով հայ զինուոր սպաննուած է, ատրպէյճանցի մէկ զինուոր վիրաւորուած է: Ուրբաթ նոյն վայրին մէջ տեղի ունեցած է եւս մէկ բախում, որու ընթացքին ոչ ոք տուժած է: Վերջին օրերուն փոխհրաձգութիւններ տեղի ունեցած են նաեւ Շուշա քաղաքի (հայերէն ՝ Շուշի) շրջակայքը, Լեռնային Ղարաբաղի սրտին մէջ` տարածքին մէջ տեղակայուած 2000 ռուս խաղաղապահներու քիթի տակ: Թշնամական երկու ճամբարները կը հրաժարին պատասխանատուութենէն՝ այս միջադէպերու համար», -ըսուած է յօդուածին մէջ:
Կրինշփանը նկատած է, որ պատերազմէն ետք երկու երկիրներու թշնամութիւնը չի հանդարտիր, բայց Յունիսէն ի վեր Ռուսաստանի միջոցով բանակցութիւնները որոշակի առաջընթաց գրանցած են:
«Ատրպէյճանը դժկամօրէն կ'ազատէ զինադադարէն ետք գերեվարուած հայերը՝ Լեռնային Ղարաբաղի մէջ հայկական զինուած ուժերու կողմէ ականապատուած տարածքներու քարտէզներու փոխարէն: Վերջին երեք տասնամեակներու ընթացքին անոնք հարիւր հազարաւոր ականներ տեղադրած են ՝ թշնամիի առաջխաղացումը զսպելու յոյսով», - նշած է յօդուածի հեղինակը:
Կրիշփինը նաեւ ընդգծած է, որ վստահութիւն չկայ նաեւ Ատրպէյճանի եւ արեւմտեան երկիրներու միջեւ յարաբերութիւններուն մէջ` օրինակ բերելով Պաքուի հրաւէրով դիւանագիտական ջոկատի քառասունէ աւելի ներկայացուցիչներու այցը Շուշի, բայց ԵԱՀԿ Մինսքի խումբի համանախագահ երկիրներու դեսպաններու կողմէ այդ հրաւէրի անտեսման աղմկայարոյց դէպքը:
«Երբ 9 Յուլիսին Պաքուն կազմակերպեց դեսպաններու այցը Շուշա (Շուշի)՝ Լեռնային Ղարաբաղը գրաւելու խորհրդանշական քաղաք, 46 երկիր արձագանգեց: Բայց Մինսքի խումբի երկիրներէն (Ֆրանսա, ԱՄՆ, Ռուսաստան) կամ Գերմանիայէն ոչ մէկ ներկայացուցիչ եկաւ», - մեկնաբանած է լրագրողը` աւելցնելով, որ Իլհամ Ալիեւը լաւ յարաբերութիւններ կը պահպանէ Վլատիմիր Փութինի հետ, իսկ Ուաշինկթընի, յատկապէս Փարիզի հետ կապը կտրուկ վատացած է:
«Հայաստանը մօտ է Մոսկուային, քանի որ անկէ կախուած է Հայաստանի անվտանգութիւնը, սակայն Երեւանը կարողացած է մերձենալ Եւրոմիութեան»,-գրած է հեղինակը` յիշեցնելով, որ խորհրդարանական ընտրութիւններէն ետք Պրիւքսէլը Հայաստանին առաջարկած է 5 տարուան ընթացքին 2,6 միլիառ եւրոյի չափով աջակցութիւն՝ հակամարտութեան հետեւանքները յաղթահարելու համար:
Լրագրողը նկատած է, որ Պաքուին ԼՂ վերականգնման համար պիտի յատկացուի 140 միլիոն եւրօ:
«Ատրպէյճանի տնտեսութիւնը, ի հարկէ, 4 անգամ աւելի մեծ է, քան Հայաստանի տնտեսութիւնը` զգալի ածխաջրածնային միջոցներու շնորհիւ: Այնուամենայնիւ, անոր մենատիրական ռեժիմը եւ Հայաստանի հետ հակամարտութեան քաղաքական լուծման բացակայութիւնը երկիրը կը պահեն Եւրոպայի ծայրամասերուն մէջ»,-եզրափակած է հեղինակը:
