Լիբանանի՝ մեծութեամբ երկրորդ քաղաքին՝ Թրիփոլիի մէջ անկարգութիւններու հետեւանքով հայ համայնքը վնասներ չէ կրած, չեն տուժած հայկական եկեղեցին, դպրոցը, ակումբը,-ըսած է Լիբանանի «Ազդակ» օրաթերթի գլխաւոր խմբագիր Շահան Գանտահարեանը:
«Թրիփոլիի մէջ ունինք թէ՛ հայկական եկեղեցի, թէ՛ հայկական դպրոց, թէ՛ ակումբ: Հայկական կառոյցները չեն վնասուած: Քաղաքի հայկական համայնքը փոքրաթիւ է: Հայերու շրջանին տուժածներ չկան»,-ըսած է Գանտահարեանն ու աւելցուցած, որ հայ համայնքի ներկայացուցիչներէն արշաւներուն մասնակցողներ չկան:
Ընդհանուր առմամբ, իրադրութիւնը ան գնահատած է մտահոգիչ: «Քորոնա» ժահրային իրավիճակը, նիւթական շատ ծանր կացութիւնը, երկրին մէջ «լոքտաունը» առաջացուցած են քաղաքացիներու բողոքը, ցասումը: Գանտահարեանի խօսքով՝ դրամատնային համակարգը ոչ լիարժէք կ'աշխատի, կայ գործազրկութիւն, լիբանանեան դրամանիշն անկում ապրած է: Այս ամէնը ծանր իրավիճակ ստեղծած են:
Թրիփոլիի մէջ քաղաքացիներու եւ իրաւապահ մարմիններու բախումներ տեղի կ'ունենան, կան վիրաւորներ, տուժածներ, վնասուած են խանութներ: Անկարգութիւններուն մասնակցողներն նաեւ Թրիփոլիի քաղաքապետարանի շէնք ներխուժած են:
«Պէյրութի մէջ եւս ցոյցեր եղած են, սակայն աւելի փոքր ծաւալով: Ճանապարհներ փակուած էին, սակայն իրաւապահ մարմինները յաջողած էին վերաբանալ անոնք»,-ըսած է հայ համայնքի ներկայացուցիչը:
Լիբանանի մէջ այժմ «Քորոնա» ժահրը շատ տարածուած է, հիւանդանոցներու գերյագեցուածութեան հետեւանքով երբեմն մահեր գրանցուած են:
«Ցաւօք, հայ համայնքէն ալ, «Քորոնա» ժահրի պատճառով մահեր կ'ունենանք: Հիւանդանոցներու գերյագեցուածութեան, առողջապահական համակարգի փլուզման երեւոյթ կ'ընթանայ, հիւանդանոցներու մէջ տեղ չկայ: Եւ այդ կը յանգեցնէ լուրջ խնդիրներու»,-ըսած է ու աւելցուցած, որ թէեւ «լոքտաունի» հետեւանքով վարակակիրներու թիւի որոշակի անկման միտում նկատուած է, սակայն իրավիճակը դեռ կը շարունակէ մնալ ծանր:
Անդրադառնալով հարցին, թէ արդեօք Լիբանանի մէջ հայ համայնքն այժմ ընկերային դժուարութիւններ ունի՞, Գանտահարեանն ըսած է, որ բնականաբար:
«Ընդհանուր վիճակն է այդպիսին: Կայ նաեւ քաղաքական անորոշութիւն, նշանակուած է վարչապետ, վարչապետը չի յաջողիր կազմել կառավարութիւն. եւ քաղաքական անորոշութիւն, եւ տնտեսական դժուարութիւններ, եւ «Քորոնա» ժահր»,-ըսած է ան:
Սակայն Գանտահարեանը վստահեցուցած է, որ Լիբանանի հայ համայնքը կը շարունակէ ինքնակազմակերպման եղանակով կարիքաւոր ընտանիքներուն օգնութիւն հասցնել, վարակակիրներուն կը փորձեն տեղաւորել հիւանդանոցներուն մէջ, համապատասխան ծառայութիւններ կ'աշխատին: Պէյրութէն դէպի Երեւան շաբաթը մէկ անգամ թռիչքներ կ'իրականացուին:
Նիւթը՝ «Արմէնբրէս»էն
Միացիր մեզ Տելեգրամում
Միացիր մեզ Յութուբում
Կիսվել
