-0.91c
Երեվան
երք, փտր 04
Միացեալ Նահանգներու նախագահ Տանըլտ Թրամփ յայտարարած է, որ կ՚ուզէ համաձայնութեան գալ Ուքրանիոյ հետ՝ երկրի հազուագիւտ հողային տարրերուն հասանելիութիւն ստանալու համար՝ որպէս Ռուսիոյ հետ պատերազմին Քիեւին Միացեալ Նահանգներու աջակցութիւնը շարունակելու պայման: Այս մասին գրած է apnews.com-ը:
Լրագրողներու հետ զրոյցին Թրամփ դժգոհած է, որ Միացեալ Նահանգները աւելի շատ ռազմական եւ տնտեսական օգնութիւն ուղարկած է Ուքրանիա, քան եւրոպացի գործընկերները:
«Մենք կ՚ուզենք գործարք կնքել Ուքրանիոյ հետ, որու շրջածիրէն ներս մենք անոնց տուածի համար կը ստանանք անոնց հազուագիւտ հողային տարրերը եւ այլ բաներ», -ըսած է Թրամփ:
Թրամփ նշած է, որ Ուքրանիոյ կառավարութենէն տեղեկութիւն ստացած է, որ անոնք պատրաստ են գործարք կնքելու՝ Միացեալ Նահանգներու համար հասանելի դարձնելու ժամանակակից բարձր արհեստագիտական տնտեսութեան համար կարեւոր տարրերը:
«Մենք հարիւր միլիառաւոր տոլարներ կը ներդնենք: Անոնք ունին մեծ հազուագիւտ հողային տարրեր: Եւ ես կ՚ուզեմ հազուագիւտ հողային տարրերու հարցով ապահովութիւն ունենալ, եւ անոնք պատրաստ են այդ ընելու», - նշած է Միացեալ Նահանգներու նախագահը:
Թրամփ, որ աւելի վաղ ըսած էր, որ պատերազմին արագ վերջ պիտի դնէ, աւելցուցած է, որ բանակցութիւնները կը շարունակուին՝ հակամարտութիւնը աւարտին հասցնելու համար:
«Մենք շատ առաջընթաց գրանցած ենք Ռուսիոյ եւ Ուքրանիոյ հարցով: Կը տեսնենք, թէ ինչ կ՚ըլլայ: Մենք կը պատրաստուինք դադրեցնել այդ ծիծաղելի պատերազմը», - եզրափակած է ան:
