3.09c
Երեվան
չրք, մրտ 04
Ընդառաջելով Մայիս 24-ին Արցախի Հանրապետութեան խորհրդարանին մէջ ներկայացուած քաղաքական կուսակցութիւններու` Հանրապետութեան նախագահին ուղղուած նամակին` Արցախի նախագահ Արայիկ Յարութիւնեանը Մայիս 25-ին հրաւիրած է Անվտանգութեան խորհուրդի ընդլայնուած նիստ: Արցախի Հանրապետութեան նախագահի գրասենեակէն կը տեղեկացնեն.
«Երկրի ղեկավարը նախ ընդգծել է, որ Արցախի իշխանութիւնների եւ ժողովրդի համար խիստ անընդունելի է Եւրոպական խորհրդի նախագահ Շարլ Միշէլի յայտարարութեան մէջ տեղ գտած «Ղարաբաղի էթնիկ հայ բնակչութեան իրաւունքներն ու անվտանգութիւնը» ապահովելու մասին ձեւակերպումը` նշելով, որ այն չի արտայայտում անցած երեսուն տարիների ընթացքում միջազգային հանրութեան համար յստակ ձեւակերպուած արցախահայութեան պահանջներն ու ձգտումները, որոնց հիմքում դրուած է ժողովուրդների ինքնորոշման իրաւունքը:
Նախագահ Յարութիւնեանի ներկայացմամբ` ինքը հնարաւորութիւն է ունեցել ՀՀ վարչապետի հետ հանդիպել եւ քննարկել Մայիս 22-ին Պրիւքսէլում տեղի ունեցած Փաշինեան-Ալիեւ հանդիպումը, եւ այդ առթիւ ցանկանում է մէկ անգամ եւս հաստատել, որ Արցախի ճակատագրի ու կարգավիճակի որոշման բացառիկ իրաւունքը պատկանում է Արցախի ժողովրդին ու իշխանութիւններին: Նախագահի խօսքով` վարչապետ Փաշինեանն ընդգծել է, որ որեւէ մէկը չի կարող եւ չի պատրաստւում Հայաստանի ու Արցախի ժողովրդի թիկունքում ինչ-որ փաստաթուղթ ստորագրել, եթէ կը լինի յստակ առաջարկ յստակ լուծումների մասին, ապա այն կը քննարկուի Արցախի իշխանութիւնների հետ եւ հանրութիւնը դրա մասին տեղեկացուած կը լինի պատշաճ ձեւով:
Նախագահ Յարութիւնեանը շեշտադրել է, որ Արցախի Հանրապետութիւնը անշեղօրէն շարունակում է իր ժողովրդի ինքնորոշման իրաւունքի լրիւ ու անվերապահ իրացման միջոցով անկախութեան միջազգային ճանաչման ուղին, եւ արցախցիների իրաւունքների ու անվտանգութեան պատշաճ ապահովումը հնարաւոր է բացառապէս Ատրպէյճանի կազմից դուրս»:
