11.09c
Երեվան
հնգ, ապր 25
Սպիտակ տան Ազգային անվտանգութեան խորհուրդի ռազմավարական հաղորդակցութիւններու հարցերով համակարգող Ճոն Քըրպին խօսած է Ռուսիոյ եւ Չինաստանի միջեւ բանակցութիւններու արդիւնքներու մասին, որոնք տեղի ունեցան երեքշաբթի՝ մարտ 21-ին։ Այս մասին գրած է «ՌԻԱ Նովոստին»։
Անոր կարծիքով՝ մեծ ակնկալիքներ չկան, որ Չինաստանի եւ Ռուսիոյ նախագահներու հանդիպումով Ուքրանիոյ մէջ ռազմական գործողութիւնները շուտով կ'աւարտին:
Սպիտակ տան ռազմավարական հաղորդակցութեան համակարգողը նշած է, որ Չինաստանի դիրքորոշումը Ուքրանիոյ մէջ պատերազմի հարցով անաչառ չէ: Անոր համոզմամբ՝ եթէ Չինաստանը կ'ուզէ կառուցողական դեր խաղալ Ուքրանիոյ մէջ շարունակուող հակամարտութեան հարցով, պէտք է Ռուսիոյ կոչ ընէ դադարեցնելու ներխուժումը այսօր իսկ:
Քըրպին նաեւ յայտարարած է, որ հակառակ Չինաստանի նախագահ Սի Ծինփինի Մոսկուա կատարած այցին, Միացեալ Նահանգներու նախագահ Ճօ Պայտըն պատրաստ է հաղորդակցելու Փեքինի հետ:
Մարտ 20-ին Սպիտակ տունը յայտնած էր, որ նախագահ Ճօ Պայտընի եւ Սի Ծինփինի հեռախօսազրոյց դեռ նախատեսուած չէ, սակայն ամերիկացի առաջնորդը կը ցանկար, որ այն կայանայ։
