Շրջանին մէջ օտար ուժերու ներկայութիւնը՝ վնասակար. Իրանցի զօրավար

Շրջանին մէջ օտար ուժերու ներկայութիւնը՝ վնասակար. Իրանցի զօրավար

Ընդհանուր սահմաններուն խաղաղութեան եւ անվտանգութեան հաստատումը հնարաւոր է միայն հարեւան երկիրներու միասնականութեամբ, իսկ օտարներու ներկայութիւնը տարածաշրջանին մէջ լարուածութիւն եւ հակամարտութիւններ կ'առաջացնէ։ Այս մասին յայտարարած է Իրանի զինուած ուժերու գլխաւոր շտաբի պետ, զօրավար Մոհամետ Պաղերին, կը տեղեկացնէ IRNA-ն։

Մոհամետ Պաղերին եւ Ատրպէյճանի պաշտպանութան նախարար Զաքիր Հասանովը երեքշաբթի հեռախօսազրոյց ունեցած են:

Պաղերին ըսած է, որ երկու երկիրներու զինուած ուժերու համագործակցութեան ու փոխյարաբերութիւններու մակարդակը կը զարգանայ բոլոր ոլորտներու մէջ։

Ան նաեւ յայտարարած է Պաքուի մէջ համատեղ ռազմական յանձնաժողովին մասնակցելու Իսլամական Հանրապետութեան զինուած ուժերու պատրաստակամութեան մասին։

Ատրպէյճանի պաշտպանութեան նախարարը յայտարարած է Իրանի հետ երկկողմ ռազմական եւ պաշտպանական համագործակցութիւնն ընդլայնելու երկրի պատրաստակամութեան մասին։ «Մենք Իրանը կը համարենք բարեկամ երկիր եւ կ'ողջունենք Թեհրանի հետ պաշտպանական համագործակցութիւնը բոլոր ոլորտներու մէջ»,- աւելցուցած է նախարարը։

Հասանով Պաղերին հրաւիրած է այցելելու Պաքու։