5.09c
Երեվան
երկ, դկտ 22
«Համազգային»ի Հայ Կրթական եւ Մշակութային Միութեան Տիթրոյթի Շրջանը նշած է «Արաքս» պարախումբի 20-ամեակը։
Այս մասին «Արեւելք» տեղեկացաւ «hairenikweekly»-էն։
«Համազգային» Հայ Կրթական եւ Մշակութային Միութեան Տիթրոյթի Շրջանը 16 Նոյեմբեր 2025-ին նշեց բացառիկ մշակութային իրադարձութիւն մը՝ «Արաքս» պարախումբի 20-ամեակը։ Տօնական հանդիսութիւնը ամփոփեց երկու տասնամեակ նուիրում, հետեւողական աշխատանք եւ երիտասարդ սերունդներուն մէջ, հայկական պարի պահպանման ու փոխանցման կարեւոր առաքելութիւն։ Ուշագրաւ էր, որ այսօրուան պարողներուն մէջ կային նաեւ նախկին պարողներու զաւակներ. բան մը, որ կ՚ընդգծէ «Արաքս» պարախումբի ճանապարհի շարունակութիւնը եւ նոր սերունդներուն փոխանցումը։
Պարախումբի գլխաւոր պարուսոյցը Նայիրի Կարապետեանն է, որ քսան տարուան վաստակով եւ սերունդներ բեմ հանելու իր նուիրումով ու փորձառութեամբ նպաստած է «Արաքս» պարախումբի աճին եւ երիտասարդ պարողներու պատրաստման։ Տիգրան Գալլան, որ սկզբնապէս բեմ բարձրացած է իբրեւ պարող եւ ապա երկար տարիներ Նայիրի Կարապետեանի կողքին գործած է իբրեւ օգնական պարուսոյց, նոյնպէս արժէքաւոր դեր ունի խումբի աշխատանքներուն մէջ։ Իսկ իբր նորութիւն՝ այս տարուան յայտագիրը աւելի ճոխացնելու նպատակով «Արաքս» պարախումբը հիւրաբար ընդունեց Լիբանանէն ժամանած պարուսոյց Կարօտ Հանեշեանը, որ իր մասնագիտական պատրաստութեամբ՝ համագործակցաբար Նայիրի Կարապետեանի եւ Տիգրան Գալլանի հետ, նպաստեց այս տարուան պարերուն որակային բարձրացման։
Հանդիսութեան բացումը կատարեցին վարչութեան ատենապետուհի Շողեր Ուրլեան եւ պարող Կարօտ Համագործեան, որոնք շեշտեցին «Արաքս» պարախումբի անփոխարինելի դերը՝ սփիւռքի մէջ հայկական ինքնութիւնը, երաժշտութիւնը եւ պարը կենդանի պահելու սուրբ գործին մէջ։ Անոնք շնորհակալութիւն յայտնեցին պարուսոյցներուն, բոլոր պարողներուն, ծնողներուն, կամաւորներուն եւ աջակիցներուն, որոնք երկու տասնամեակ շարունակ ամուր կանգնած են պարախումբի կողքին։
Երեկոյի ծրագիրը ընդգրկեց հարուստ եւ բազմազան ելոյթներ։ Յաջորդաբար ներկայացուեցան հետեւեալ պարերը՝ Բերդ Պար, Հեյ Ջան Ղափամա, Քանի Վուր Ճան Իմ, Մուսալեռ, Ճէյրան Պալա, Մախմուր Աղջիկ, Կոմիտասի Խառնանուագ, Հովիւներ, Դոնիկ–Դոնիկ, Զուրնի Թռինկի, Քոչարի, Պինկէօլ, Կրակներ, Տէր Զօր, Շիրակի Շարան, Հզօր Հայաստան, Ազգագրական, Զանգեզուրի–Աւարայր, Հա Նինա, Կակաչներ, Երեւան 2800 եւ հանդիսութեան եզրափակիչ կատարումը՝ Իմ Անունը Հայաստան, ամբողջ «Արաքս» պարախումբի մասնակցութեամբ։
Երկու գեղեցիկ մեներգներով՝ «Մարտիկի Երգը» եւ «Երեւան–Էրեբունի», հանդէս եկաւ Էրիքա Մանուկեան, որ արժանացաւ հանդիսատեսի ջերմ ու երկարատեւ ծափողջոյններուն։ Եղիշէ Չարենցի «Ես իմ Անուշ Հայաստանի» բանաստեղծութիւնը բեմէն ներկայացուեցաւ ասմունքով՝ Գոհար Կարապետեանի, Սարգիս Տօնիկեանի, Սոֆի Տագէսեանի եւ Սեւակ Տապպաղեանի կողմէ։ Անոնց զգացական կատարումը հանդիսատեսին մօտ արթնցուց ազգային հպարտութեան յուզիչ պահեր։
Աւարտին բեմ հրաւիրուեցան պարուսոյցները, կամաւորները եւ «Արաքս» պարախումբի հիմնադրման շրջանին «Համազգային»-ի ատենապետուհի՝ Հերմինէ Մանուկեան, որ իր խօսքին մէջ գնահատեց խումբի քսանամեայ նուիրեալ աշխատանքը եւ մաղթեց յաջողութիւններ երիտասարդ պարողներուն։
Երեկոն իր ամբողջ ընթացքին վերածուեցաւ մշակութային տօնի մը, ուր բեմը լեցուն էր ոգեւորուած երիտասարդներով, իսկ սրահը՝ հպարտ ու յուզուած հանդիսատեսով։ «Արաքս» պարախումբի քսանամեակը հաստատեց, որ հայկական պարը կը շարունակէ մնալ մեր ինքնութեան կենդանի շունչը եւ Տիթրոյթի հայ համայնքի մշակութային կեանքի առանցքային սիւներէն մէկը։
Վերջապէս, «Համազգային»-ի անդամները բեմ բարձրացան՝ ամբողջական նկարով մը անմահացնելու սոյն երեկոն։
