Ռուսիոյ Դաշնութեան նախագահ Վլատիմիր Փութին օրէնք ստորագրած է, ըստ որու՝ Ուքրանիոյ քաղաքացիութիւն ունեցող Ռուսիոյ Դաշնութեան քաղաքացիներու ուքրանական քաղաքացիութիւնը պիտի համարուի դադրեցուած, անոնց ՌԴ Ներքին գործոց նախարարութիւն դիմելու օրուընէ սկսեալ:
Ինչպէս հաղորդած է «Արմէնփրէս»-ը, վկայակոչելով «ՌԻԱ Նովոստի»ն, փաստաթուղթը հրապարակուած է իրաւական տեղեկատուութեան կայքով:
Օրինագիծի հեղինակներն են պատգամաւորներ Լէոնիտ Քալաշնիքով, Սերգէյ Քապիշեւ, Սերգէյ Լէոնովն ու Արթեմ Թուրով:
«Տուեալ մեքենականութեան գործնական կիրառումը պէտք է ապահովէ ՌԴ-ի նման քաղաքացիներուն՝ պետական եւ քաղաքային մարմիններու մէջ աշխատանքի անցնելու իրաւունքներ, կրթական կազմակերպութիւններու մէջ վերապատրաստում, ինչպէս նաեւ այլ հարցերու կարգաւորում, որոնց լուծման համար Ուքրանիոյ քաղաքացիութիւնը սահմանափակող գործօն է»,- ըսուած է Դաշնութեան խորհուրդի միջազգային կոմիտէի եզրակացութեան մէջ։
Օրէնքին համաձայն՝ Ուքրանիոյ քաղաքացի չըլլալու համար դիմում ներկայացնելու օրուընէ սկսեալ Ռուսիոյ Դաշնութեան քաղաքացին պարտաւոր է չձեռնարկել գործողութիւններ «կապուած Ուքրանիոյ քաղաքացիներու իրաւունքներու իրացման եւ պարտականութիւններու կատարման հետ»: Այս պարտաւորութիւնը չկատարելու պարագային կը տրուի եզրակացութիւն, ըստ որու՝ Ուքրանիոյ քաղաքացիութիւնը դադրեցնելու դիմումը կը համարուի անվաւեր։