18c
Երեվան
հնգ, հնս 18
Նիկոլ Փաշինեանի կողմէ առերեւոյթ պետական դաւաճանութիւն կատարելու եւ պաշտօնէական լիազօրութիւնները առերեւոյթ անցնելու փաստի առթիւ քրէական գործ յարուցելու պահանջով բողոքի քննութիւնը դատաւոր Կարէն Բիշարեանի որոշմամբ այսուհետեւ պիտի շարունակուի դռնբաց նիստով: Այս մասին յայտնեց 44-օրեայ պատերազմին զոհուած Մենուա Յովհաննիսեանի մայրը` Կարին Տօնոյեանը:
Յիշեցնենք, որ Նիկոլ Փաշինեանին պետական դաւաճանութեան յօդուածով քրէական հետապնդման ենթարկելու պահանջով բողոքը Վերաքննիչ դատարանը որոշած էր քննել դռնփակ կարգով: Բողոքը ներկայացուցած փաստաբան Յակոբ Մարտիրոսեանը եւ «Հայաստան» խմբակցութեան պատգամաւոր Արծուիկ Մինասեանը միջնորդած էին բողոքի քննութիւնը անցընել դռնբաց կարգով, սակայն դատարանը միջնորդութիւնը լսելէ յետոյ առանց որեւէ դիրքորոշում յայտնելու յետաձգած էր նիստը: Այդ ընթացքին դատարանի բակին մէջ հաւաքուած էին զոհուածներու ծնողները, յոյս ունենալով, որ դատարանը կը բաւարարէ բողոքաբերներու միջնորդութիւնը: Բողոքի քննութիւնը յետաձգելու որոշումը ծնողները վրդովուեցուցած էր եւ անոնք գացած էին Բարձրագոյն դատական խորհուրդ` հանդիպելու խորհուրդի նախագահի պարտականութիւնները կատարող Գագիկ Ջհանկիրեանի հետ: Լսելով ծնողներուն դժգոհութիւնները` Ջհանգիրեանը նշծ էր, որ այդ հարցը լուծում կը ստանայ:
Յիշեցնենք, որ 2021 թուականի Յունիս ամսուն անոնք յանցագործութեան մասին հաղորդում ներկայացուցած էին, մասնաւորապէս, պահանջելով քրէական գործ յարուցել Նիկոլ Փաշինեանի կողմէ կատարուած առերեւոյթ պետական դաւաճանութեան փաստի առթիւ:
