3.09c
Երեվան
երք, փտր 24
Կառավարութեան նիստի ժամանակ Նիկոլ Փաշինեան շարք մը պարզաբանումներ եւ հիմնաւորումներ ներկայացուցած է, որպէսզի թէ՛ հայաստանեան, թէ՛ միջազգային հանրութեան համար տարածաշրջանին մէջ հաստատուած իրադրութիւնը աւելի պարզ ըլլայ:
«Ատրպէյճանի դիրքորոշումն այն է, որ ԼՂ հիմնախնդիր չկայ, այն այլեւս լուծուած է: Բայց չի պատասխանում մի կարեւոր հարցի` ինչպէ՞ս է լուծուել ԼՂ հայութեան իրաւունքների հարցը: Սա է պատճառը, որ միջազգային հանրութիւնը շարունակաբար խօսում է ԼՂ հիմնախնդրի համապարփակ կարգաւորման անհրաժեշտութեան մասին: Հասկանալով, որ այս հիմնախնդիրն աւելի է արտայայտուելու միջազգային օրակարգում, Ատրպէյճանը փորձում է փակել այն: Եւ այս գործողութիւնն է մեկնարկել Ասկերանի շրջանի Փառուխ գիւղից, որը շարունակուելու ակնյայտ միտում ունի:
Ատրպէյճանը փորձում է բոլոր հայերին տեղահանել ԼՂ-ից, այդպիսով հարցը փակուած համարելու համար: Եթէ սխալւում ենք, ուրեմն թող Ատրպէյճանը Լեռնային Ղարաբաղի հայութեան իրաւունքների եւ անվտանգութեան երաշխիքների հարցերի քննարկման նկատմամբ կոնկրէտ հետաքրքրութիւն ցուցաբերի: Խնդիր, որ առաջ է քաշում ոչ միայն Հայաստանը, այլեւ ողջ միջազգային հանրութիւնը:
Իսկ պաշտօնական Պաքուն հակառակ ուղղութեամբ է շարժւում` պնդելով, որ Լեռնային Ղարաբաղ չկայ:
Ի դէպ, այն, որ Ատրպէյճանը որդեգրել եւ իրականացնում է «Լեռնային Ղարաբաղն առանց հայերի» քաղաքականութիւն, հիմնաւորւում է նաեւ 2020թ. Նոյեմբերի 9-ի եռակողմ յայտարարութեան կամայական մեկնաբանութիւններով: Այդպիսիք են, օրինակ, Ատրպէյճանի շարունակական պնդումները, թէ Նոյեմբերի 9-ի եռակողմ յայտարարութեամբ արձանագրուել է Պաշտպանութեան բանակը Լեռնային Ղարաբաղից դուրս բերելու պարտաւորութիւն», ըսած է Նիկոլ Փաշինեանը:
Անոր խօսքով` «ԼՂ Պաշտպանութեան բանակի դուրսբերումը նշանակում է ԼՂ-ից հայերի դուրսբերում»:
