0.09c
Երեվան
շբթ, փտր 21
Hye Camp-ը ԱՄՆ -ի Արեւելեան Թեմի կազմակերպութեամբ ճամբար մըն է, որուն իրենց մասնակցութիւնը կը բերեն ամերիկահայ պատանի ու պարմանուհիներ։ Անոնք միասնաբար կ՚անցընեն շաբաթ մը, մօտէն ծանօթանալով հայ մշակոյթին եւ ստանալով հայեցի ու քրիստոնէական լիցքաւորում։
Այս առթիւ ալ Թեմակալ Առաջնորդ Հոգշ. Տ. Մեսրոպ վրդ. Պարսամեան գրառում մը կատարած է, որ կը ներկայացնենք ստորեւ՝
Հիանալի ժամանակ անցուցի երբ այցելեցի Շիքակոյի մէջ գտնուող Hye Camp-ի տարածքը: Ճամբարականներուն հետ ամբողջ օր մը անցընելը իսկապէս օրհնութիւն էր, եւ մեր քրիստոնէական հաւատքին եւ հայկական ժառանգութեան հանդէպ անոնց խանդավառութիւնը, իսկապէս ջերմացնող էր:
Բովանդակալից քննարկումներ ունեցանք, ուր հնարաւորութիւնը ունեցայ պատասխանելու մեր հաւատքին, աւանդոյթներուն եւ հայ եկեղեցւոյ վերաբերեալ անոնց հարցումներուն: Ոգեշնչող էր անոնց սորվելու ձգտումը եւ մեր սուրբ ժառանգութեան հետ անոնց ամուր կապը:
Մեր համայնքի ապագան պայծառ է, քանի որ ունինք այսպիսի խանդավառ եւ ներգրաւուած երիտասարդներ: Արմատներուն հանդէպ իրենց սէրը ինծի յոյսով ու հպարտութեամբ լեցուց։ Hye Camp-ը բացառիկ աշխատանք կը կատարէ մեր երիտասարդութեան հոգեւոր եւ մշակութային աճը խթանելու գործին մէջ:
Սրտանց շնորհակալութիւն կը յայտնեմ Hye Camp-ի վարչութեան, տնօրէն՝ Հայր Արէն վրդ. Ճէպէճեանին, վարչական Ճէնիֆըր Մորիսին, Միջին Արեւմուտքի իմ հոգեւորական եղբայրներուն, անձնակազմին, խորհրդատուներուն եւ բոլոր անոնց, որոնք սրտանց ու հոգիով կ՚աշխատին, երեխաներուն համար նման հարստացնող փորձառութիւն մը պարգեւելու համար: Ձեր նուիրուածութիւնը գնահատելի է, եւ դուք կը կերտէք մեր հայ համայնքի ապագան՝ սերմանելով մեր արժէքները եկող սերունդին մէջ:
Ճամբարականներու ծնողներուն եւ ընտանիքներուն շնորհակալութիւն կը յայտնենք իրենց երեխաները մեզի վստահելու համար։ Անոնք ականատես կ՚ըլլան իրենց երեխաներուն անհատական եւ խմբային աճին, երբ անոնք կը բացայայտեն իրենց արմատները եւ երկարատեւ բարեկամութիւններ կը մշակեն:
Եկէք շարունակենք դաստիարակել եւ հզօրացնել մեր երիտասարդները՝ անոնց հնարաւորութիւնը ընձեռելով կառչելու իրենց հայկական ժառանգութեան, երկարատեւ բարեկամութիւններ մշակելու եւ դառնալու սիրոյ եւ խաղաղութեան դեսպաններ մեր համայնքներուն մէջ: Միասին մենք կրնանք կառուցել աւելի ուժեղ, աւելի համախմբուած հայկական սփիւռք։
Թող Աստուած առատօրէն օրհնէ ձեզ բոլորդ եւ առաջնորդէ մեր երիտասարդ ճամբարականները իրենց աճի եւ բացայայտման ճանապարհին մէջ:
