11.09c
Երեվան
չրք, ապր 16
Յետ կարճատեւ հիւանդութեան Միացեալ Նահանգներու մէջ (Լոս Անճելըս) իր մահկանացուն կնքած է երիտասարդ հայուհի ՝ Հելէն Մանոյեան-Կարապետեանը։
Այս մասին իմացանք հանգուցեալի մտերիմներէն։
Նշենք, որ Պէյրութ ծնած Հելէն Մանոյեան-Կարապետեանը երկար տարիներէ ի վեր հաստատուած էր ԱՄՆ։
Ան մայր էր երկու զաւակնեու, սիրուած եւ գործունեայ միութենական եւ համայնքի մէջ աշխոյժ ներկայութիւն հանդիսացող պարտաճանաչ հայուհի։
Այս տխուր առթիւ իր հարազատներէն՝ Լիզա Ճիկէրեան Մանոյեան գրած է «՝Անհաւատալի է եւ Աստուծոյ դժուարին թող չերթայ, իմ սիրասուն ու բարի տալիկս ոչ եւս է: Կատարեալ քոյր, տիպար կին ու մայր, սիրալիր հօրաքոյրը Մեղեդիիս եւ կնքամայրը Յովիկիս, որոնց իր հարազատ զաւակներուն նման կը սիրէր եւ կ'ուրախանար իրենց արձանագրած իւրաքանչիւր յաջողութեամբ: Փափկանկատ, զօրաւոր, հայրենասէր, հայասէր, աշխատասէր, ստեղծագործ, գեղեցիկ, բարեսիրտ եւ հրաշալի քոյրս երէկ մօրը տարեդարձին օրը միացաւ հրեշտակներուն փաղանգին: Վստահ եմ որ հոգիդ պիտի արժանանայ երկնային արքայութեան եւ օր մը պիտի հանդիպինք անպայման»։
Ուշագրաւ է նաեւ, որ երկար տարիներով ՀՅԴ դաստիարակութեան արժանացած հայուհին, նոյնիսկ իր ծանր հիւանդութիւնն անտեսելով Արցախեան 44-օրեայ պատերազմի օրերուն նկարներ պատրաստած էր, զանոնք վաճառած եւ հաւաքուած գումարները լումա առ լումա ուղարկած էր պատերազմի նիւթական կարիքները հոգացող մարմիններուն։
Այսպիսի օրինակելիութեան առջեւ անկարելի է գլուխ չխոնարհել...
Բիւր յարգանք իր յիշատակին։
