-7.91c
Երեվան
երք, փտր 04
Ստամբուլում օրերս կատարվել է Կորեական պատերազմի հայ վետարան Էդուարդ Ժամկոչյանի հուղարկավորությունը:
«Արեւելք»ի Ստամբուլի աղբյուրները տեղեկացնում են, որ Կորեական պատերազմի հայ մասնակիցը հինգ տարի է՝ խնամվում էր Ստամբուլի «Փըթիթ սեոր» ֆրանսիական ծերանոցում, որտեղ էլ մահացել է:
Էդուարդ Ժամկոչյանը ծնվել է 1931 թվականին, չի նշվում, թե ինչ պայմաններում է մասնակցել Կորեական պատերազմին (1950- 1953), սակայն նրա հուղարկավորության արարողությունը կատարվել է զինվորական կարգով, ներկա են եղել Թուրքիայի հանրապետության բարձրաստիճան զինվորականներ, անվտանգության համակարգի աշխատողներ, որոնց մեջ՝ Կենտրոնական հրամանատարության ամբողջ անձնակազմը՝ ներառյալ հրամանատարը, նաեւ կուսակալի օգնականը եւ Շիշլիի քաղաքապետարանի ապահովության տնօրենը: Վերջին հրաժեշտի արարողությունը կատարվել է Ս. Վարդանանց հայկական եկեղեցում:
Պոլսո հայոց պատրիարքարանից տեղեկանում ենք, որ Էդուարդ Ժամկոչյանի հուղարկավորությունից օրեր հետո Պոլսո հայոց պատրիարք Սահակ արք. Մաշալյանն այցելել է «Փըթիթ սեոր» ծերանոց, ցավակցել նրա հարազատներին: Պատրիարքը միաժամանակ տեղեկացել է, որ նույն ծերանոցում ապրում են համայնքից մոտ հիսուն ծերեր, որոնց պարբերաբար այցելում են հայ հոգեւորականները:
