22.15c
Երեվան
շբթ, հնս 27
Երէկ Հայաստանի Ազգային ժողովի ընդդիմադիր «Հայաստան» խմբակցութիւնը հրապարակեց հետեւեալ յայտարարութիւնը.
Յարգելի՛ հայրենակիցներ,
Ազրպէյճանը, օգտուելով Հայաստանի օրուայ իշխանութիւնների յանցաւոր անգործութիւնից ու մուրացկանային քաղաքականութիւնից, ոտնձգութիւններ է իրականացնում մեր երկրի նկատմամբ: Բռնագրաւուած են Հայաստանի Հանրապետութեան տարածքները, վտանգուած է մեր ինքնիշխանութիւնը եւ Հայաստանի Հանրապետութեան քաղաքացիների կեանքի իրաւունքը:
Միեւնոյն ժամանակ արձանագրում ենք «խաղաղութեան դարաշրջան» խոստացած ու այդ խոստմամբ խաբէութեամբ քուէ կորզած օրուայ իշխանութիւնների լիակատար ձախողումն արտաքին քաղաքականութեան, բանակաշինութեան, պետական կառավարման ոլորտներում: Այս ամէնը վկայում է Նիկոլ Փաշինեանի ոչ օրինականութեան մասին:
Մեզ համար անընդունելի են Նիկոլ Փաշինեանի` Հայաստանի Հանրապետութեան անկախութեան հռչակագրին հակասող յայտարարութիւնները:
Մենք դրական ենք գնահատում Արցախի Հանրապետութեան Անվտանգութեան խորհրդի նիստում վերահաստատուած դիրքորոշումը Ղարաբաղեան հակամարտութեան կարգաւորման վերաբերեալ, այն է` Արցախի ժողովրդի ինքնորոշման իրաւունքի եւ դրա իրացման արդիւնքների լրիւ ու անսակարկելի ճանաչում:
Դատապարտում ենք իշխանութիւնների ներքին ու արտաքին քաղաքականութիւնը, որը վերջնականապէս փլուզում է անվտանգութեան այն փխրուն համակարգը, որը դեռեւս հայկական պետականութեանը հնարաւորութիւն է տալիս գոյութիւն ունենալ:
Թաքնուելով «Հաւաստի աղբիւր»-ի անուան տակ` օրուայ իշխանութիւնը նախապատրաստում է հայ ժողովրդին նոր` մահացու զիջումների եւ զուգահեռաբար խրախուսում հակառուսական ջղաձգութիւնը` փորձելով իր ձախողումների մեղաւորներ նշանակել: Եւ դա այն դէպքում, երբ Արցախի անվտանգութեան ու արցախահայութեան կեանքի իրաւունքը ռուսական խաղաղապահներն են ապահովում, իսկ հայ-թուրքական սահմանին ռուսական ռազմախարիսխ է տեղակայուած:
Հայաստանի ու Արցախի շուրջ տեղի ունեցող զարգացումների հետ կապուած մեր ժողովուրդը բազմաթիւ հարցեր ունի Ռուսաստանի Դաշնութեան ու ՀԱՊԿ-ի վարքագծի կապակցութեամբ, բայց այս ամէնով հանդերձ անընդունելի է «Հաւաստի աղբիւր»-ի ու նրա քարոզչագործիքների անունից իրականացուող քաղաքականութիւնը` Հայաստանում հակառուսական մթնոլորտ ձեւաւորելու եւ մեր երկիրն աշխարհաքաղաքական սուր հակամարտութեան թատերաբեմ դարձնելու ուղղութեամբ:
Հայաստանը Ռուսաստան-Արեւմուտք հակադրութեան մէջ մանրադրամ դարձնելու օրուայ իշխանութեան արկածախնդրային քաղաքականութիւնը մեր երկրի համար կործանարար հետեւանքների կարող է յանգեցնել: Համոզուած ենք, որ միայն իշխանափոխութեան դէպքում է հնարաւոր ռազմավարական-դաշնակցային-բարեկամական յարաբերութիւնները վերականգնել Ռուսաստանի ու Իրանի հետ, ինչպէս նաեւ վստահելի, կանխատեսելի ու յարգանք վայելող գործընկեր դառնալ Արեւմուտքի հետ յարաբերութիւններում:
Յարգելի՛ հայրենակիցներ,
Հայաստանի Հանրապետութեան անկախութեան հռչակագրում նշուած դրոյթները չեն կարող սակարկման առարկայ դառնալ:
Հայաստանի Հանրապետութեան տարածքային ամբողջականութիւնը, ինքնիշխանութիւնը ենթակայ են պաշտպանութեան բոլոր միջոցներով: Մենք կողմ ենք հարեւանների հետ համակեցութեան կանոններ գտնելուն ու յարաբերութիւններ հաստատելուն, բայց դրանք պէտք չէ լինեն մեր անվտանգութեան ու արժանապատուութեան հաշուին: Դէմ ենք միջպետական հաղորդակցական ուղիների գործարկումը միջանցքային տրամաբանութեամբ իրականացնելուն:
Իրական ու արժանապատիւ խաղաղութիւնը հնարաւոր է ապահովել միայն պետութեան արդիւնաւէտ ներքին ու արտաքին քաղաքականութեամբ, արհեստավարժ խումբով, բանակի վերականգնմամբ, հանրային լայն համախմբում ու համերաշխութիւն ապահովելով, Հայաստանի կողմից նոր բանակցողով:
«ՀԱՅԱՍՏԱՆ» ԽՄԲԱԿՑՈՒԹԻՒՆ
5 հոկտեմբեր 2022
