16.74c
Երեվան
ուրբ, մրտ 14
Իրանի մէջ իր մահկանացուն կնքած է Թեմի արժանաւոր եւ երիցագոյն քահանայ հանդիսացող՝ Արժ. Տ. Վարազդատ Աւագ Քհնյ. Քէշիշեանը։
Ստորեւ կը ներկայացնենք Տէր Հօր մահուան մասին հրապարակուած մահագրութիւնը՝
Խոր ցաւով կը տեղեկացնենք, որ այսօր 8 յուլիսին՝ կեանքի 93-րդ տարուան մէջ, վախճանած է Հայաստանեայց Առաքելական Սուրբ Եկեղեցւոյ նուիրեալ սպասաւոր, արժանապատիւ Տ. Վարազդատ Աւագ Քահանայ Քէշիշեանը:
Տէր Վարազդատը՝ աւազանի անունով Յակոբ Քէշիշեան ծնած է 1932 թուականին, Իրանի Սպահան նահանգի, Փերիա գաւառի Բոլորան գիւղը: Ան կը սերէր քահանայական գերդաստանէ եւ իր անունը ժառանգած էր մեծ հօրմէ՝ Տէր Յակոբ Տէրտէրեանէ:
Տէր Վարազդատ 28 յուլիս, 1966-ին ձեռնադրուած է որպէս քահանայ եւ մինչեւ իր կեանքի վերջին օրերը՝ 58 տարի քահանայագործած է Թեհրանի հայոց թեմի ենթակայ քաղաքներուն մէջ՝ Թեհրան, Ռաշտ, Անզալի, Սարի եւ այլն:
7 մարտ, 1977-ին արժանացած է լանջախաչ, իսկ 10 փետրուար, 1983-ին ծաղկեայ փիլոն կրելու իրաւունքին։
29 յուլիս, 1991-ին, Մեծի Տանն Կիլիկիոյ Գարեգին Բ Կաթողիկոսի (յետագային Գարեգին Ա Ամենայն հայոց Կաթողիկոս) սրբատառ կոնդակով ստացած է աւագութեան տիտղոս:Տ. Վարազդատ աւագ քահանայ Քէշիշեան երկար տարիներ զբաղեցուցած է առաջնորդական փոխանորդի պաշտօնը, անդամակցած է ԹՀԹ (Թեհրանի Հայոց թեմ) Պատգամաւորական ժողովին, Դատական խորհուրդին եւ Կրօնական խորհուրդին:
Ան սիրուած, բարի համբաւ վայելող եւ յարգուած քահանայ էր:
Լուրը՝ «Արաքս-նիւզ»ի թելեկրամեան ալիքէն
