3.09c
Երեվան
չրք, նմբ 13
Մերձավոր Արևելքի Հայ Ավետարանական եկեղեցիների հարաբերությունների համակարգող վեր. Նշան Բակալյանն ու տիկինը՝ Մարիա Բակալյանը Հայաստան են այցելել հատուկ առաքելությամբ. տարիներ առաջ ազգականից ստացած 18-րդ դարի Սաղմոսարանն ու Շարակնոց ձեռագիր գրքերը նրանք ընծայեցին Մատենադարանին:
Հարցին, թե ինչու՞ այդպես որոշեցին, վեր. Նշանը պատախանում է. «Այս ձեռագրերն այնքան արժեքավոր են, որ միայն մերը չէին կարող լինել: Ոմանք մեզ հարցնում են, թե ինչու՞ չվաճառեցինք, լավ գումար կշահեինք: Բոլոր այդ մարդկանց նույն պատասխանն եմ տալիս. այդ կերպ այս գրքերի արժեքը կիջեցնեինք: Սրանք անգին են, դրա համար պետք է լինեն բոլորինը»:
Արժեքավոր ձեռագրերի ընծայաբերման նպատակով հայրենիք են այցելել նաև վեր. Նշանի քույրն ամուսնու հետ: Քեշիշյան ընտանիքը Ֆիլադելֆիայի Հայ Ավետարանական Նահատակաց եկեղեցու և Ամերիկայի Հայ Ավետարանչական ընկերակցության անունից Մատենադարանին ընծայեցին 15-16-րդ դարերի Գանձարան և 18-րդ դարի Ժողովածու, որոնք փրկվել են Թուրքիայի խանութներից մեկում հայտնված ամերիկացի միսիոների գնումների արդյունքում:
4 արժեքավոր ձեռագիրը Մատենադարանի թանգարանի ընծայաբերման սրահում Մատենադարանին են նվիրաբերվել հանդիսավոր արարողությամբ՝ «Նվիրական անուններ. մատյանների տունդարձը» խորագրով ցուցադրության շրջանակներում
«Մատյանի մուտքը Մատենադարան, մեր կարծիքով ամենից սպասված և կարևոր իրադարձություններից է ոչ միայն տնօրինության և աշխատակազմի համար, այլև հոգևոր արժեքներին առնչվող և դրանց հանդեպ պատասխանատվության զգացումով օժտված յուրաքանչյուր հայի համար»,- նշել է Մատենադարանի տնօրեն Արա Խզմալյանը:
«Այս ձեռագրերն այստեղ հասան գաղթի ճանապարհով՝ Օսմանյան Կայսրությունից՝ Խարբերդից, Պոլսից մինչև ԱՄՆ՝ Ֆիլադելֆիա, Ֆլորիդա, Վաշինգտոն, այնուհետև՝ Բեյրութ: Այս ճանապարհն անցած գրքերը վերջապես տանն են: Սրանք կարծես հայ ժողովրդի խորհրդանիշն են»,- նշել է վեր. Նշան Բակալյանը՝ ավելացնելով, որ ինչպես աստվածատուր մշակույթն է մարդուն հարստացնում, այնպես էլ իրար բարձրացնող մարդիկ են հարստացնում ազգը:
Բարձրարժեք ձեռագրերի ընծայաբերման համար Վեր. Նշան Բակալյանն ու տիկին Մարիան արժանացել են «Բարերար Մատենադարանի ոսկե մեդալ»-ի:
