-1.91c
Երեվան
երք, հնվ 14
Լիբանանցի արմատներով ֆրանսացի լրագրող Րանտա Թաքի Ալ Տինի կարծիքով Ֆրանսայի մէջ տեղի ունեցածը համաշխարհային պատերազմի մէկ մասն է: Փարիզ հաստատուած լրագրողը, որուն կարծիքով երէկ Ֆրանսայի Նիս քաղաքին մէջ եղածը արհաւիրք էր եւ վախի մթնոլորտ կը տիրէ ամբողջ Ֆրանսայի մէջ: Թաքի Ալ Տին նաեւ ըսած է, որ հակառակ ապահովական մարմիններու բոլոր քայլերուն, ահաբեկիչները հասած են իրենց նպատակին, որովհետեւ անոնց կատարած արարքը անկանխատեսելի էր: Լրագրողը նաեւ ըսած է, թէ ահաբեկչութիւն կատարողը, որ կը կարծուի, թէ թունուզեան արմատներով 31-ամեայ ֆրանսացի մըն է, նախապէս որեւէ կասկածելի գործունէութեան մէջ չէ եղած: Ան նաեւ յայտնած է, որ սխալ կ'ըլլայ Ֆրանսայի կառավարութիւնը մեղադրել անհոգութեան կամ անփութութեան մէջ, որովհետեւ պետութիւնը գործ ունի անհաւասարակշիռ մարդոց հետ, որոնց նպատակն է առաւելագոյն թիւով մարդոց կեանքը խլել: Նշենք, որ երէկ Նիսը հարուածած ահաբեկչական յարձակումին հետեւանքով զոհուած էին 84 անձեր: Վիրաւորեալներէն 18-ին վիճակը կը մնայ ծանր: Ֆրանսայի ոստիկանութիւնն ու հակահաբեկչական յատուկ ջոկատայիններ յատուկ կարգադրութիւններու դիմած են ամբողջ երկրին մէջ: Ըստ տեղական մարմիններու, ահաբեկչական գործողութիւններու հաւանականութիւնը կը մնայ բարձր մինչեւ այս պահը:
