18.09c
Երեվան
չրք, մրտ 12
Թուրքիոյ նախագահ՝ Ռէճէպ Էրտողանի հայեացքը միշտ ալ ուղղուած եղած է Եւրոպական Միութիւն եւ 2005-էն ի վեր ձգտում ունեցած է, որ Թուրքիան անդամ դառնայ Եւրոպական Միութեան: Բրիտանիոյ Եւրոպական Միութենէն դուրս գալէ ետք, Էրտողան կրկին ցանկութիւն յայտնած է յարաբերութիւնները վերականգնելու Եւրոպական Միութեան հետ, յոյս յայտնելով, որ 27 երկիրներէ բաղկացած այս միութիւնը կ'ունենայ նոյն փափաքը:
Յիշեցնենք, որ Էրտողանի յարաբերութիւնները Եւրոպայի հետ եւ ի մասնաւորի Յունաստանի եւ Ֆրանսայի հետ լարուած են Թուրքիոյ վարած արտաքին քաղաքականութեան հետեւանքով, կապուած Արեւելեան Միջերկրականի եւ Միջին Արեւելքի հետ:
Փորձելով ներգրաւուիլ Միութեան կազմին մէջ մանաւանդ Բրիտանիոյ «Պրեքզիթ»-էն ետք, Էրտողան իր խօսելաոճը Եւրոպական երկիրներու հանդէպ մեղմացուցած է: Ան, որ Ֆրանսայի նախագահ՝ Էմմանուէլ Մաքքրոնի հետ անհատական տարաձայնութիւններ ունէր, պատրաստակամութիւն յայտնած է վերանայելու Փարիզի հետ յարաբերութիւնները, «Մենք կը ցանկանք լարուածութենէ դուրս հանել մեր յարաբերութիւնը Ֆրանասայի հետ»,- ըսած է Էրտողան:
Եւրոպայի կողմէ կիրառուած պատժամիջոցները Թուրքիոյ նկատմամբ, խորացուցին երկրի տնտեսական տագնապը եւ ազդեցին Էրտողանի ժողովրդականութեան վրայ:
Իր հերթին Էրտողան ակնարկած է, թէ Թուրքիոյ ձգտումը ընդունուելու Եւրոպական Միութեան կազմին մէջ կրնայ նոր թափ ստանալ մանաւանդ Բրիտանիոյ դուրս ելլելէն ետք:
«Կարելի է յաղթահարել «Պրեքզիթ»-ի հետ յառաջացած անորոշութիւնը, երբ Թուրքիան գրաւէ իր արժանի տեղը Եւրոպական Միութեան մէջ»,- ըսած է Էրտողան աւելցնելով, որ Թուրքիան երբեք չէ հրաժարած Եւրոպական Միութեան լիարժէք անդամ ըլլալու նպատակէն:
Միւս կողմէ Եւրոպան մտահոգութիւններ ունի Թուրքիոյ կապակցութեամբ, մասնաւորապէս մարդու իրաւունքներու վերաբերող հարցերով, յատկապէս, որ Էրտողան սաստկացուցած է իր բռնապետական ճնշումները 2016-ի յեղաշրջման փորձէն ետք:
Ըստ Էրտողանին, 2021 տարին կարելի է ընել համերաշխութեան տարի մը Թուրքիոյ եւ Եւրոպական Միութեան միջեւ:
