image

Աստղիկ Սաֆարեանի հայրենասիրական մօտեցումն ու ... երգը

Աստղիկ Սաֆարեանի հայրենասիրական մօտեցումն ու ... երգը

Օրերս, երգչուհի Աստղիկ Սաֆարեան թողարկեց իր «Հայաստան» երգի տեսահոլովակը: Երգը՝ երգչուհիին «Դու ուժեղ ես» անուամբ 4-րդ ձայնասկաւառակի երգերէն մէկն է, որոնց հեղինակը բացառապէս ինքն է: Ստեղծագործելով փոփ-ռոք երաժշտական ժանրով, այս սկաւառակը նուիրած է իր երաժշտական գործունէութեան 15 ամեակին: 

Երգչուհին տաղանդաւոր է ոչ միայն երաժշտական, այլեւ լեզուամշակութային ոլորտին մէջ: Ան կը տիրապետէ երեք օտար լեզուներու՝ սպաներէն, անգլերէն եւ ռուսերէն: Որոշ ժամանակ ապրելով եւ ուսանելով սպանական Պարսելոնա քաղաքին մէջ, ան Հայաստան վերադարձած է երաժշտական նորութիւններով, համատեղելով անոնք հայերէն երգերու հետ:

Սաֆարեան շատ աքթիւ է իր ինսթակրամեան էջով: Ան պարբերաբար լուսանկարներ կը հրապարակէ իր աշխատանքային առօրեայէն, փորձելով իր հետեւորդներուն փոխանցել դրական տրամադրութիւն: 

Երգչուհին՝ հայրենասիրութեան գաղափարին շուրջ շատ հետաքրքրական  մօտեցում կը ցուցաբերէ: Կը հաւատայ, որ հայրենասիրութիւնը առաջին հերթին հայրենակիցներուն հանդէպ ցուցաբերած սէրն ու յարգանքն է: Այս առիթով, ան իր տուած հարցազրոյցներէն մէկուն մէջ կը կիսուի իր միտքերով: Մեջբերենք իր խօսքերէն. «Սիրում եմ հայրենիքը եւ փորձում եմ ամէն ինչ անել իմ գծով, որովհետեւ իւրաքանչիւրը պէտք է իր գործով օգտակար լինի հայրենիքին: Իսկ ես կարող եմ այդպէ'ս օգտակար լինել. ժպիտներ պարգեւել իմ հանդիսատեսին, լաւ տրամադրութիւն տալ, նրանք գան՝ իմ երգերի տակ լաւ   զգացմունքներ ապրեն, աւելի սիրեն իրենց կողքի նստած մարդը... Ստեղծի'ր, արա' այն ինչ կարող ես, ու թող դա վայելի հայրենիքը»: 

Ստորեւ ձեզ կը ներկայացնենք տեսահոլովակը, որուն ռեժիսորն է Տիգրան Յարութիւնեան, պարուսոյցը՝ Արմինէ Պետրոսեան, իսկ ոճաբանը՝ նոյն ինքը երգչուհին է: Ան հանդէս եկած է ինքնատիպ ոճով՝ ստեղծելով տպաւորիչ կերպարներ: