image

Արցախի ազգային անվտանգութեան ծառայութեան նախկին ղեկավար Կամօ Աղաջանեանի դէմ նախաձեռնուած է քրէական վարոյթ

Արցախի ազգային անվտանգութեան ծառայութեան նախկին ղեկավար Կամօ Աղաջանեանի դէմ նախաձեռնուած է քրէական վարոյթ

Քրէական գործ յարուցուած է Արցախի ազգային անվտանգութեան ծառայութեան (ԱԱԾ) նախկին ղեկավար Կամօ Աղաջանեանի դէմ: Այս մասին կը հաղորդէ Արցախի Դատախազութիւնը:

««Hetq.am» կայքում հրապարակուել էր «Կամօ Աղաջանեանին կրկին ուզում են պաշտօն տալ Արցախի կառավարութիւնում»  վերտառութեամբ յօդուածը, որում հեղինակը նշել էր նաեւ հետեւեալը.

«Ահա մի դրուագ նրա գործունէութիւնից: Նախքան 2020 թուականի 44-օրեայ պատերազմը Հադրութ քաղաքում գործում էր «ԱԿ» անուանումով ճաշարան, որը պատկանում էր Կամօ Աղաջանեանի ընտանիքին։ Այստեղ աշխատում էր նրա մտերիմ Աշոտ Ամիրջանեանը: Վերջինս Կամօ Աղաջանեանի պաշտօնավարման ողջ ընթացքում ձեւականօրէն ձեւակերպուել ու աշխատավարձ է ստացել տարբեր պետական մարմիններից. նախ՝ Արցախի Հանրապետութեան պաշտպանութեան բանակից, այնուհետեւ՝ ՀՀ պաշտպանութեան նախարարութիւնից, երբ Կ.Աղաջանեանը ղեկավարում էր Գորիսի ջոկատը, իսկ վերջում՝ Արցախի ոստիկանութիւնից: Այստեղից էլ Աշոտ Ամիրջանեանը անցել է երկարամեայ ծառայութեան կենսաթոշակի: Մինչդեռ «աշխատանքային գործունէութեան» այդ ողջ ընթացքում Աշոտ Ամիրջանեանը Հադրութում աշխատեցնում էր Կամօ Աղաջանեանի ընտանիքին պատկանող ճաշարանը: Կամօ Աղաջանեանը մեծ հողատարածքներ ունէր ազատագրուած շրջաններում, փայտի պիզնեսում էր ներգրաւուած, խանութներ, սննդի կէտեր:»:

Նկատի ունենալով, որ վերոգրեալում առերեւոյթ առկայ են պաշտօնէական դիրքի չարաշահման եւ պետութեանը գոյքային վնաս պատճառելու յանցաւոր դէպքերի մասին վկայող տուեալներ, ուստի յիշեալ հրապարակումն ուղարկուել է ԱՀ ազգային անվտանգութեան ծառայութիւն՝ ԱՀ քրէական դատավարութեան օրէնսդրութեամբ սահմանուած ընթացակարգով քննութեան առնելու համար:

 

Ծանուցում. ենթադրեալ յանցանքի մէջ կասկածուողը կամ մեղադրուողը համարւում է անմեղ, քանի դեռ նրա մեղաւորութիւնն ապացուցուած չէ ԱՀ քրէական դատավարութեան օրէնսգրքով սահմանուած կարգով` դատարանի` օրինական ուժի մէջ մտած դատավճռով:»