5.09c
Երեվան
երք, փտր 17
Արցախի Հանրապետութեան նախագահ Արայիկ Յարութիւնեանը հրամանագիր ստորագրած է, որով սահմանուած են ռազմական դրութեան իրաւական կարգի ընթացքին տեղեկութիւններու հրապարակման կամ տարածման կանոնները:
Հրամանագրին մէջ, մասնաւորապէս, կ'ըսուի.
«Արցախի Հանրապետութեան տարածքում յայտարարուած ռազմական դրութեան իրաւական կարգի ընթացքում, ելնելով պետական եւ հասարակական արտաքին եւ ներքին անվտանգութեան ապահովման անհրաժեշտութիւնից, ռազմական բնոյթի տեղեկատուութեան, պետական անվտանգութեանը վերաբերող ոչ ռազմական բնոյթի տեղեկատուութեան, Արցախի Հանրապետութեան սահմանային իրավիճակին վերաբերող տեղեկատուութեան եւ հրապարակումների, մարտական սարքերի, զինուած ուժերի եւ այլ զօրքերի վերաբերեալ հրապարակումների, տեղեկատուական նիւթերի, հարցազրոյցների, հաղորդումների եւ դրանց հետ անմիջականօրէն առնչուող այլ տեղեկութիւնների (այսուհետ բոլորը միասին` հաղորդում) հրապարակային տարածումը, փոխանցումը, ներառեալ համացանցային կայքերում եւ ընկերային ցանցերում դրանց հրապարակումների ձեւով (այսուհետ` հրապարակում), կատարւում է բացառապէս պետական մարմինների կողմից տրամադրուած կամ հրապարակուած պաշտօնական տեղեկատուութեան (այսուհետ` պաշտօնական տեղեկատուութիւն) յղումով` ամբողջութեամբ արտացոլելով պաշտօնական տեղեկատուութիւնը (առանց խմբագրման)»:
Հրամանագրին մէջ նաեւ կ'ըսուի, որ «պետական եւ տեղական ինքնակառավարման մարմինների եւ պաշտօնատար անձանց` ռազմական դրութեան իրաւական ռեժիմի եւ պետական անվտանգութեան ապահովմանն առնչուող գործողութիւնները (այդ թւում` ելոյթները, հրապարակումները) առերեւոյթ կեղծուած ներկայացուող եւ (կամ) հերքող հաղորդումների հրապարակումն արգելւում է»:
Կ'արգիլուի նաեւ Արցախի Հանրապետութեան պաշտպանունակութեան ու անվտանգութեան դէմ ուղղուած քարոզչութիւնը:
«Հաղորդումների հետ կապուած պաշտօնական յայտարարութիւններով֊ հանդէս են գալիս Արցախի Հանրապետութեան Նախագահը, Արցախի Հանրապետութեան համապատասխան ոլորտի պետական լիազօրուած մարմինները, իսկ այլ անձինք` Արցախի Հանրապետութեան Նախագահի յանձնարարութեամբ», կը նշուի հրամանագրին մէջ:
