16.43c
Երեվան
շբթ, հնս 27
Անցնող ինը տարիներուն Լիբանան քաղաքական եւ ապահովական պատճառներու բերումով չէր կարողացած Սահմանադրութեան ուժով ամրագրուած ընտրութիւնները իրականացնել: Քաղաքացիական հասարակութեան կարծիքով ընտրութիւնները տապալուած էին երկրի իշխող ուժերուն կողմէ, անընդհանտ պատրուակ բռնելով ապահովական իրավիճակն ու անյարմար եւ անարդար ընտրական օրինագիծը: Ի դէպ այս առաջին անգամն է, որ լիբանանցիք ընտրութիւն պիտի կատարեն յենուելով համամասնական օրէնքին վրայ, որուն մէջ յատուկ տեղ յատկացուած է «վարկանիշային» եղանակով գործիչներ խորհրդարան հասցընելու հնարաւորութիւնը:
Երկրի մը մէջ, ուր սուր բնոյթ ունին կրօնական-յարանուանական լարումները ակներեւ է, որ այս ընտրութիւնները պիտի կայացուին ընդհանուր համաձայնական մթնոլորտի մը մէջ, որուն երկու գլխաւոր ուժերն են քրիստոնեայ-մարոնի նախագահը եւ իսլամ – սիւննի վարչապետը:
Գաղտնիք չէ, որ նախագահ Աունի եւ վարչապետ Սաատ Հարիրիի միջեւ առկայ այս համաձայնութիւնը «անհանգստութիւն» կը պատճառէ իշխանական «կերակրաման»էն հեռու մնացած կողմեր, բայց եւ այնպէս յստակ է, որ Սէուտական Արաբիոյ եւ Իրանի անմիջական «հովանաւորութիւն»ը վայելող երկու կողմերը բաւական ինքնավստահ են եւ կ'ուղղուին ըլլալու խորհրդարանի գլխաւոր երկու ուժերը:
Յիշեցման կարգով պարտինք նշել, որ շնորհիւ նոյն համաձայնութեան 31 հոկտեմբեր 2016-ին եւ շուրջ երկու տարուան ճիգերէն ետք Լիբանան կարողացած էր նոր նախագահ ընտրել եւ երկրի «արեւմտամէտ պլոք»ին համար «անբաղձալի տարր» համարուող զօրավար Միշէլ Աունը հասցընել Պաապտայի նախագահական պալատ:
Գալով հայկական ճակատին հետաքրքրականն է այն, որ հակառակ անցնող տարիներու ընդհանուր պատկերին հայկական երկու գլխաւոր կուսակցութիւնները ՝ ՀՅԴ-ն եւ ՍԴՀԿ-ն ընտրութեան կը մասնակցին միասնական ցուցակով, մինչ ՌԱԿ-ը ներգրաւուած է «Լիբանանեան ուժեր» կուսակցութեան ընտրական դաշինքներուն մէջ:
Ուշագրաւ է նաեւ, որ քաղաքացիական հասարակութեան տարբեր խմբաւորումներուն մէջ ներգրաւուած են անկուսակցական հայորդիներ, սակայն ինչպէս անցեալին այսօր եւս լիբանանահայութեան ջախջախիչ տոկոսը միտուած է քուէարկել ՀՅԴ-ին:
«Արեւելք» վաղը ամբողջ օրը պիտի հետեւի Լիբանանի խորհրդարանական ընտրութիւններուն՝ իր ընթերցողներուն ներկայացնելով համապարփակ եւ ճշգրիտ տուեալներ, ընտրական ընթացքին, ընտրութիւններու արդիւնքներուն ու նաեւ «հայկական ճակատ»ին մօտ տիրող ընդհանուր տրամադրութիւններուն մասին:
