3.09c
Երեվան
հնգ, փտր 26
Մեր դիտարկումները եւ դաշինքի նախընտրական շտապներէն եկած տեղեկատուութիւնը կը փաստեն, որ խախտումները սկսած են ընտրութեան օրէն շատ աւելի վաղ: Այս մասին յայտարարութիւն տարածած է «Հայաստան» դաշինքը։
Յայտարարութեան մէջ, մասնաւորապէս, ըսուած է․
««Հայաստան» դաշինքն իր երախտագիտութիւնն է յայտնում 2021թ. Յունիսի 20-ի ՀՀ ԱԺ ընտրութիւններում դաշինքին աջակցած եւ իր օգտին քուէարկած Հայաստանի Հանրապետութեան քաղաքացիներին: Այն վստահութիւն է ներշնչում, որ երկրի մասին մտահոգ մեր հարիւր հազարաւոր քաղաքացիներ ոչ միայն տեսան հայ ժողովրդի առջեւ ծառացած գոյութենական սպառնալիքները, այլ նաեւ իրենց հաւանութիւնը տուեցին «Հայաստան» դաշինքի կողմից առաջարկուած լուծումներին:
«Հայաստան» դաշինքը վերահաստատում է իր մօտեցումը, որ խորհրդարանական ընտրութիւնների արդիւնքները խիստ վիճայարոյց են եւ վստահութիւն չեն ներշնչում: Մենք ունենք լուրջ հիմքեր, այս ընտրութիւնները ոչ լեգիտիմ (օրինական) համարելու եւ յայտարարելու, որ այսպիսի արդիւնքներով ԱԺ-ն չի արտացոլում ուժերի իրական յարաբերակցութիւնը: Մեր դիտարկումները եւ դաշինքի նախընտրական շտապներից եկած տեղեկատուութիւնը փաստում են, որ խախտումները սկսուել են ընտրութեան օրուանից շատ աւելի վաղ: Իսկ բուն ընտրութեան օրը բազմաթիւ տեղամասերից մեր վստահուած անձանց ահազանգերի նախնական ամփոփումը վկայում է, որ խօսքը գնում է ընտրութեան արդիւնքների համակարգուած եւ նախապէս պլանաւորուած (ծրագրուած) կեղծարարութեան մասին:
Մասնաւորապէս.
1. Ձեւաւորուեց ոչ մրցակցային ընտրական միջավայր, գործող իշխանութեան կողմից զանգուածաբար օգտագործուեցին վարչական ռեսուրսները (միջոցները), ձեռնարկուեցին ընտրական ահաբեկման առերեւոյթ գործողութիւններ:
2. Ընտրահաշուարկը սկսելուն պէս բազմաթիւ տեղամասերում տեղի ունեցան ելեկտրաէներգիայի անջատումներ: Խօսքը գնում է մարզերի ամբողջական, առանձին համայնքների մասին՝ Արմաւիր, Լոռի, Շիրակ, Արագածոտն եւ այլն:
3. Բազմաթիւ տեղամասերում արձանագրուեցին այդ բնակավայրերին օտար մեծ թուով քաղաքացիների առկայութիւն եւ քուէարկութիւն, որը հիմք է տալիս ենթադրելու, որ գործել է շրջիկ մոպիլ խմբերի կեղծարարութեան համակարգ:
4. Անհերքելի իրողութիւն է բանակի անթաքոյց ուղղորդուած քուէարկութիւնը, որն իշխանութեան համար ապահովել է մեծաքանակ ձայներ:
5. Առկայ է խորը կասկած, որ գործել է ընտրութիւնների ծրագրային ապահովման կեղծարարութիւն, որն ի սկզբանէ բացառում է օբյեկտիւ (առարկայական) արդիւնքների հնարաւորութիւնը:
6.Առանձին համայնքներում իշխանութեան կողմից քօղարկուած ընտրակաշառքի դէպքերի մասին ահազանգեր կան:
«Հայաստան» դաշինքն օգտագործելու է ընտրութեան արդիւնքները վիճարկելու ողջ գործիքակազմը՝ այդ թուում դիմելու է Սահմանադրական դատարան: Դաշինքը սկսում է քաղաքական կոնսուլտացիաներ (խորհրդակցութիւններ) ընտրութիւններին մասնակցած այլ ուժերի հետ միասնական ՍԴ դիմելու հնարաւորութիւնը քննարկելու համար»:
