13.09c
Երեվան
երկ, նմբ 25
Անցնող օրերուն լարուած մթնոլորտ տիրած է Լիբանանի Մըզեարա քրիստոնէական աւանին մէջ: Պատճառը գիւղին իրենց առանձնատան մէջ 26-ամեայ երիտասարդուհի Ռայա Շըտեաքի սպանութիւնն է, որ ցնցած է ամբողջ գաւառը: Դէպքը պատահած է անցեալ կիրակի արեւածագին, երբ Շըտեաք ընտանիքի առանձնատան պահակ հանդիսացող սուրիացի բանուորը մուտք գործած է Ռայաի առանձնասենեակ եւ Սուրիա մեկնելու համար գումարներ պահանջած է: Երիտասարդուհին, յայտնելէ ետք, որ իր մօտ գումար չկայ, առաջարկած էիր ունեցած գոհարեղէնն ու ինքնաշարժը տալ: Ոճրագործը սակայն ընդդիմացած ու բռնաբարելէ եւ տանջանքներու ենթարկելէ ետք սպաննած է զինք: Դէպքը մեծ աղմուկ բարձրացուցած է գիւղին մէջ եւ ոճրագործը ընդունած եւ խոստովանած է իր յանցանքը:
LBCI կայանը, որ այս մասին երկար նիւթ մը պատրաստած է, նոյնպէս կը յայտնէ, որ մինչեւ այս պահը գիւղին մէջ լարուած իրավիճակ կը տիրէ եւ Ռայաիի ծնողներն ու բարեկամները կը պահանջեն, որ ոճրագործը գիւղի կեդրոնական հրապարակին վրայ կախաղան բարձրացուի:
Կը հաղորդուի նաեւ, որ գիւղի ղեկավար մարմիններ եւ ընտանիքներ բողոքի ալիք մը բարձրաձնելով պահանջած են հոն հաստատուած սուրիացիներէն անմիջապէս լքել եւ հեռանալ գիւղէն:
Յիշեցնենք, որ այս առաջին դէպքը չէ, որ կը կատարուի Լիբանանի մէջ ու մասնաւորապէս 2011 թուականին սկիզբ առած Սուրիոյ պատերազմէն ասդին նմանօրինակ դէպքերը դարձած են յաճախակի:
Երկրին մէջ քիչ չեն այն կողմերը, որոնք մահապատիժի կիրառման վերադարձ կը պահանջեն՝ հաշուի առնելով, որ նման ոճիրներու կանխարգելումը կարելի է իրականացնել միայն այդ խիստ ճանապարհով:
Լիբանան, որպէս Ֆրանքոֆոն երկիր եւ անսալով Եւրոպական Միութեան պահանջներուն յետս կոչած է մահապատիժ կիրառելու բոլոր եղանակները:
Նիւթը ՝ LBCI-էն, պատրաստեց՝ «Արեւելք»
