8.09c
Երեվան
շբթ, նմբ 16
Ամիսներ շարունակ կառավարություն չունենալուց հետո քիչ առաջ Լիբանանում կազմվել է նոր կառավարություն՝ 20 անդամներով: Կառավարության մեջ ավանդաբար հայերին բաժին ընկնող մեկ նախարարությունն այս անգամ կին է գլխավորելու. ՀՅԴ-ի կողմից առաջադրված Վարդինե Օհանյանը (Օհանյան-Գեւորգյան) նշանակվել է Սպորտի եւ երիտասարդության հարցերի նախարար: Մինչ այդ նա գլխավորում էր հատուկ կարիքներ ունեցող հայ երեխաների «Զվարթնոց» կենտրոնը: Ծնվել է 1984-ին, ամուսնացած է, ունի երկու երեխա: Ըստ ԶԼՄ-ների, առաջին անգամ Լիբանանի պատմության մեջ հայուհին դարձել է կառավարության անդամ: Նախորդ կառավարության կազմում հայերին բաժին էր ընկել Զբոսաշրջության նախարարությունը, որը գլխավորում էր Ավետիս Կիտանյանը: Լիբանանի սահմանադրության համաձայն, կառավարությունը կազմվում է երկրի համայնքները ներկայացնող անդամներից:
Մամուլը կառավարության երկար սպասված կազմումը համարել է «նոր Լիբանանի սկիզբ»՝ նկատի ունենալով, որ ամիսներ շարունակ երկրում տիրող քաղաքական ու տնտեսական խիստ ճգնաժամային վիճակը կարող է նորանշանակ վարչապետ Հասան Դիաբի եւ նոր կառավարության ջանքերով հանգուցալուծում գտնել:
2019 թվականի դեկտեմբերի 19-ին Լիբանանի խորհրդարանը վարչապետ էր ընտրել Հասսան Դիաբին: Անցյալ տարվա հոկտեմբերից երկրում ծայր էին առել բողոքի եւ անհնազանդության ցույցեր ու հավաքներ, որոնք շարունակվում են մինչեւ այսօր. ցուցարարների պահանջներից մեկը տնտեսական լուրջ բարեփոխումներն են: Նրանք նաեւ պահանջում էին նոր կառավարություն:
Լիբանանի նոր կառավարությունն այսօր գումարելու է առաջին նիստը:
