Երէկ Հալէպի մէջ զոհուած Վազգէն Ճապաղջուրեանը երկար տարիներու հաւատաւոր ՀՄԸՄ-ական էր: Այս մասին «Արեւելք» տեղեկութիւն ստացաւ հանգուցեալի հարազատներէն: 1944 -ին Հալէպ ծնած Վազգէն հայր էր երկու դուստրերու` Վարդենի եւ Դալար: Ան երկար տարիներ ծառայած է ՀՄԸՄ-ի շարքերուն մէջ եւ 1960-ականներուն իբրեւ Ֆութպոլիստ հանդէս եկած է ՀՄԸՄ-ի Հալէպի Ֆութպոլի խումբէն: Նշենք, որ երէկ եղած հրթիռարձումներու պահուն Վազգէն իր երեք ծանօթներուն հետ գտնուած է «Զուարթնոց» եկեղեցւոյ (որ նաեւ իր տան շրջանն է) շրջանին մէջ եղող խանութի մը մէջ: Ահաբեկիչներու նետած պայթուցիկ տակառի պայթումին հետեւանքով չորս հալէպահայերու մարմինները ածխացած են: Վազգէն Ճապաղջուրեանի հետ զոհուածներուն անուններն են՝ Լեւոն Քէլխաչերեան, Յովսէփ Ջանէցեան եւ Խաչիկ Ապուլապութեան: Շուրջ 3 տարի առաջ Հալէպի «Նոր Գիւղ» շրջանին մէջ հրթիռարձակումի հետեւանքով նոյնպէս զոհուած էր Վազգէն Ճապաղջուրեանի հարազատը ՝ Վրէժ Ճապաղջուրեան: