Ոչ եւս է գերմանահայ տաղանդաւոր դերասան ՝ Առաքել Մելիքեան

Ոչ եւս է գերմանահայ տաղանդաւոր   դերասան ՝ Առաքել Մելիքեան

Օրերս, 99 տարեկան հասակին, Գերմանիոյ մէջ իր մահկանացուն կնքած է գերմանական թատրոնի հայազգի դերասան, բեմադրիչ, լրագրող, թարգմանիչ եւ արձակագիր Գրիգոր Առաքել Իմանուէլ Մելիքեան: 

27 հոկտեմբերին, Պերլինի մէջ, 99 տարեկան հասակին վախճանած է գերմանական թատրոնի հայազգի դերասան, բեմադրիչ, լրագրող, թարգմանիչ եւ արձակագիր Գրիգոր Առաքել Իմանուէլ Մելիքեան: Ծնած է 1924-ին Գերմանիոյ Պիլեֆելտ քաղաք, տիգրանակերտցի հօրմէ (Գրիգոր Մելիքեան) եւ գերմանուհի մօրմէ: Նախնական կրթութիւնը ստացած է ծննդավայրին մէջ, 1942-ին յաճախած է Լունիպուրկի մանկավարժական դպրոցը: Երկու տարի ուսանած է Տիւսելտորֆի պետական թատրոնի բարձրագոյն դպրոցը՝ աշակերտելով նշանաւոր դերասան Կիւստաւ Կրիւնթքէին: Առաջին անգամ բեմ բարձրացած է 1949-ին՝ Էտինպուրկի թատերական փառատօնին: 1959-ին կարճ ժամանակով աշխատած է Փարիզի Ազգային թատրոն, 1957-1960 թուականներուն՝ Շուէտի մէջ, ներկայացուցած է նաեւ Ուիլիամ Սարոյեանի թատրոններէն: Եղած է նաեւ Պերնի ռատիոկայանի ազատ աշխատակից, յօդուածներ գրած է հայ թատրոնի, պատմութեան եւ մշակոյթի մասին: 1967-ին հաստատուած է Արեւմտեան Պերլին, յաճախած Ազատ համալսարանի դասընթացներուն, հիմնադրած «Շթուտիօ Տիայկնես» թատերախումբը: 30 տարիէն աւելի աշխատած է Պերլինի «Շիլլեր» թատրոնին մէջ, մասնակցած է Մայակովսկիի «Փայտոջիլ», Հոխվերթերի «Փախստականը», ֆոն Քլայսթի «Փշրուած կուժը» եւ այլ թատրոններու: Նկարահանուած է մեծ եւ փոքր պաստառներու մօտ 40 ֆիլմի մէջ՝ «Շթալնեց. մէկ մեռածն աւելի է», «Բենիամին Բլիւմխէն», «Սիեռա-Լեոնէ», «Արնախումները Հաւանայի մէջ», «Ռավիոլի», «Միսիս Հարիսը մեկնում է Մոնթէ Քարլօ», «Կեցցէ՜ այն, ինչ կը զօրացնէ», «Խենթութեան խոլորձներ», «Քապուչեւսքին տանուլ կու տայ» եւ այլն: Հանդէս եկած է նաեւ որպէս ձայնագրող դերասան: Հրատարակած է «Գիտէ՞ք այս երկիրը» (1990), «Այն ժամանակ, մի ճամպրուկ եւ այլ պատմութիւններ» (2005) ու այլ գիրքեր:

Մելիքեան գերմաներէնէն զատ տիրապետած է անգլերէն, ֆրանսերէն եւ իտալերէն լեզուներուն, իսկ հայերէն սորված է հասուն տարիքին: Ընտրուած է Պերլինի Հայ գաղութի վարչութեան անդամ: 2015 թուականին գերմանաթուրք բեմադրիչ Ֆաթիհ Աքինի հետ վերջինիս «Սպին» շարժապատկերի ցուցադրման առթիւ եղած է Ուիսպատէնի «Քալիկարի» կինոթատրոնի մէջ կայացած «Ֆոքուս Արմենիա» միջոցառման պատուաւոր հիւրը:

Այս   տխուր առթիւ  կարճ գրառում մը կատարած է Հայց. Առաքելական  եկեղեցւոյ Գերմանիոյ Թեմի  հոգեւոր սպասաւորներէն՝ Հոգշ. Տ. Եղիշէ վրդ. Աւետիսեան, որ մասնաւորապէս գրած է՝

Սիրելի Պերլինահայեր,

Խորը ցաւով յայտնում ենք, որ երկրային կեանքից հեռացել է պերլինահայ դերասան Գրիգոր Մելիքեանը։ Մեր խորին ցաւակցութիւններն ենք յայտնում Գրիգոր Մելիքեանի հարազատներին եւ գործընկերներին։ Ի խորոց սրտի աղօթում ենք առ Ամենակալն Աստուած, որ Տէրը հանգուցեալի արդար հոգին ընդունի երկնային լուսեղէն յարկերում եւ Իր մխիթարութեամբ սփոփի մերձաւորների ու ազգականների վշտացեալ սրտերը:

Յիշատակն արդարոյն օրհնութեամբ եղիցի. խունկ եւ աղօթք Գրիգոր Մելիքեանի յիշատակին. Ամէն։