9.09c
Երեվան
կրկ, մրտ 22
Առաւօտեան Տուպայի մէջ ուժգին պայթումներ լսուած են։ Այս մասին կը հաղորդէ Reuters գործակալութիւնը՝ վկայակոչելով ականատեսներ։
Իրան աւելի վաղ հաղորդած էր, որ Իսրայէլի եւ ԱՄՆ-ի հարուածներուն հետեւանքով պատասխան հարուածներ պիտի հասցնէ նաեւ տարածաշրջանի երկիրներու մէջ գտնուող ամերիկեան ռազմակայաններուն։
Իր կարգին, BBC-ն, յղում ընելով Արաբական Միացեալ Էմիրութիւններու իշխանութիւններուն, կը հաղորդէ, որ Տուպայի օդակայանին մէջ պատահարի մը հետեւանքով 4 անձ վիրաւորուած է։ Թէ յստակ ի՛նչ միջադէպ տեղի ունեցած է, չի նշուիր, սակայն կը հաղորդուի, որ վիրաւորներուն բժշկական օգնութիւն ցուցաբերուած է։
BBC-ն նաեւ կը հաղորդէ, որ Տուպայի Ճեպել Ալի նաւահանգիստին մէջ, ուր յաճախ կանգ կ՚առնեն ամերիկեան ռազմածովային ուժերու նաւերը, խոցուած է անօդաչու թռչող սարք մը։ ԱԹՍ-ի բեկորները ինկած են նաւամատոյցին վրայ՝ հրդեհի պատճառ դառնալով։ Կրակը մարուած է, տուժածներ չկան։
Աւելի վաղ մէկ այլ միջադէպ տեղի ունեցած էր Ապու Տապիի «Զայէտ» միջազգային օդակայանին մէջ։ Խոցուած ԱԹՍ-ի բեկորներուն պատճառով մէկ անձ զոհուած էր, իսկ եօթը՝ վիրաւորուած։
