15.09c
Երեվան
ուրբ, մյս 08
Լիբանան մեկնող ճամբորդները այլեւս կարիք չունին երկար մտածելու թէ ինչ նուէր պէտք է տանիլ իրենց ընտանիքի անդամներուն ու հարազատներուն։ Պայուսակները կը լեցուին արժէքաւոր այդ նուէրներով՝ դեղորայքով՝ «Փանատօլ»ով, ճնշումի եւ այլ «առաջին անհրաժեշտութեան» դեղերով։: Այս մասին «Արեւելք» կը կարդայ lebanon24 կայքէն:
Աղբիւրը նշած է, թէ Լիբանանի մէջ դեղորայքը սպառումի եզրին է, եւ գրեթէ անգտանելի, յատկապէս երբ կառավարութիւնը կասեցուց իր նեցուկը դեղորայքի նկատմամբ, տնտեսական սուր տագնապի հետեւանքներով: Այս օրերուն պանդխտութեան մէջ գտնուող լիբանանցիներէն շատեր, որոնք կը վերադառնան հայրնիք, իրենց հետ կը տանին տոպրակներով դեղորայք, ընդառաջելով իրենց հարազատներու պահանջին: «Մուրացկաններու երկիր դարձանք» ցաւով կը կրկնեն լիբանանցիք:
Աղբիւրը նշած է նաեւ թէ Լիբանանի դեղորայք ներմուծողներու սենտիքան յայտարարութիւն տարածած է, ուր կ'ըսէ թէ «երկրի ներմուծման գործընթացը ընդհանրապէս դադրած է աւելի քան մէկ ամիս է»: Ան շեշտած է, թէ Լիբանանի Կեդրոնական Դրամատան պարտքերը դեղեր արտադրող ընկերութիւններուն հատած է 600 միլիոն տոլարի սահմանները: Ներմուծողները իրենց կարգին զգուշացուցած են, որ նոյնիսկ դեղերու պահեստները սպառած են:
«Ֆրանս Փրէս»-ի հետ զրոյցին, դեղեր ներմուծողներու սենտիքայի նախագահ՝ Քարիմ Ժպարա ըսած է թէ «Վիճակը քաոսային է.. եւ յուլիսի վերջաւորութեան, հիւանդները պիտի զրկուին իրենց դեղերէն»: Եւ ըստ սենտիքային, միակ լուծումը այն է, որ կառավարութիւնը շարունակէ իր նեցուկը՝ դեղերուն եւ այդ ընէ Առողջապահութեան նախարարութեան առաջնահերթութեան ցուցակին համաձայն:
