17.09c
Երեվան
կրկ, հնս 01
Պէյրութի մէջ, օրերս, նշուած է Մայրերու օրը, կազմակերպութեամբ՝ ՔԱՀԼ-ի Հայ տարեցներու տան տիկնանց յանձնախումբի։
Այս մասին «Արեւելք» տեղեկութիւն քաղեց Պէյրութի մեր պաշտօնակից՝ «Ազդակ»էն։
Ստորեւ՝ թղթակցութիւնը ամբողջութեամբ։
Սրահը լեցուն էր գարնան ծաղիկներու բոյրով, ջերմ ու սիրալիր մթնոլորտով եւ ազնուաշուք հրաւիրեալներով` նուիրուած մեր սիրելի մայրերուն:
Ներկայ էին ազգային, բարեսիրական, եկեղեցական տարբեր կառոյցներու տիկնանց յանձնախումբերու ներկայացուցիչներ եւ ՔԱՀԼ-ի հաստատութիւնը քաջալերող հոծ թիւով բարեկամներ:
Երեքշաբթի, 29 ապրիլ 2025-ին, կէսօրէ առաջ ժամը 11:00-ին ՔԱՀԼ-Ի Հայ տարեցներու տան տիկնանց յանձնախումբը հանդիսաւոր կերպով նշեց Մայրերու օրը Տըպպայէի «Լա մարինա քլապ» ճաշարանին մէջ:
Սրահը լեցուն էր գարնան ծաղիկներու բոյրով, ջերմ ու սիրալիր մթնոլորտով եւ ազնուաշուք հրաւիրեալներով` նուիրուած մեր սիրելի մայրերուն:
Ներկայ էին ազգային, բարեսիրական, եկեղեցական տարբեր կառոյցներու տիկնանց յանձնախումբերու ներկայացուցիչներ եւ ՔԱՀԼ-ի հաստատութիւնը քաջալերող հոծ թիւով բարեկամներ:
Օրուան հանդիսավար, յանձնախումբի ատենադպրուհի Շաքէ Գարայեան իր բացման խօսքին մէջ ողջունեց ներկաները` շնորհաւորելով բոլորին Մայրերու տօնը, ապա շեշտեց մօր դերակատարութեան կարեւորութիւնը` նշելով, որ մայրը միշտ եղած է ազգին յենարանը եւ իրմով յարատեւած է ազգը: Ան աւելցուց` ըսելով. «Այսօր մենք հաւաքուած ենք ոչ միայն նշելու օրացոյցէն տօն մը, այլեւ` մեր հոգիներուն խորքէն խօսելու ձեզի, սիրելի մայրեր եւ մեծ մայրեր: Անձնուէր սիրոյ, անմար գուրգուրանքի եւ անդադրում աղօթքի խորհրդանիշ էք դուք: Ձեր հեզ ու ուժեղ ներկայութիւնը այն հիմքն է, որուն վրայ կանգնած են ընտանիքները, եւ ձեր օրհնանքներով է, որ կը լուսաւորէք սերունդներու ճամբան»: Ապա ան շնորհակալութիւն յայտնեց Թալին Խաչատուրեանին, որ սիրայօժար ու մեծ գոհունակութեամբ ընդառաջած էր այս ձեռնարկի նախագահութիւնը ստանձնելու հրաւէրին եւ կատարած` սրտաբուխ իր նուիրատուութիւնը: ՔԱՀԼ-ի տիկնանց յանձնախումբը ծաղկեփունջով մը պատուեց օրուան նախագահը:
Պատուելի Թերզեան իր խօսքը սկսաւ` շնորհակալութիւն յայտնելով ներկաներուն, որոնք ընդառաջեցին եւ ներկայ գտնուեցան այս ձեռնարկին` միասին վայելելու օրուան ջերմութինը: Պատուելին ուզեց, որ ներկաները յատուկ ձեւով տեղեկանան ՔԱՀԼ-Ի տիկնանց յանձնախումբի անդամներուն երկար տարիներու անձնազոհ եւ նուիրեալ ծառայութեան ու աշխատանքին մասին` ի նպաստ ՔԱՀԼ-ի բարգաւաճման: Ան նաեւ գնահատեց հաստատութեան անձնակազմը եւ անոր տարած դժուարին, սակայն շատ կարեւոր առաքելութիւնը: Պատ. Թերզեան հակիրճ անդրադարձաւ հաստատութեան եւ յատկապէս կուրանոցին պատմականին, որ կ՛երկարի մինչեւ 1923 Ղազիրի որբանոց: Ցեղասպանութենէն 110 տարիներ անցած են, եւ տակաւին հաստատութիւնը կը շարունակէ իր ծառայութիւնը` պատսպարելով մեր նահատակներուն թոռները:
Պատուելի Թերզեան անդրադառնալով այս ծառայութեան` ըսաւ, որ այդ մէկը սիրոյ արտայայտութիւն է` հրաւիրելով բոլորս` զիրար սիրելու իբրեւ մէկ ընտանիքի անդամներ, սիրել զիրար` իբրեւ գաղութ եւ սիրել զիրար իբրեւ մէկ ազգի զաւակներ: Յատկապէս այս օրերու անկիւնադարձային դժուարին պայմաններուն, աւելի քան երբեք, պէտք է միասնական ըլլալ եւ ձեռք-ձեռքի տալով` յաղթահարել ամէն տեսակի դժուարութիւններ: Ձեռք պէտք է երկարենք մեր շուրջ գտնուող կարօտեալին եւ տկարին: Այս սիրոյ արտայայտութիւնը իր ջերմ դրսեւորումը կ՛ունենայ նաեւ ՔԱՀԼ-ի մեծ ընտանիքին հանդէպ, ուր անտէր տարեցը կը ստանայ խնամք եւ յարգանք:
Ճաշկերոյթին ընթացքին գործադրուեցաւ գեղարուեստական յայտագիր: Ջութակահար Շահէ Աւագեան հաճելի նուագով դիմաւորեց հրաւիրեալները: Ապա վաստակաւոր երգիչ Վիգէն Տիշչէքէնեան, նուագի ընկերակցութեամբ Շանթ Տիշչեքէնեանի, ազգային, հայրենասիրական եւ սիրուած երգերով ճոխացուց ձեռնարկը եւ ուրախ մթնոլորտ մը ստեղծեց:
Աւարտին ներկաները մեծ գոհունակութիւն յայտնեցին եւ փափաք ներկայացուցին, որ նման ձեռնարկներ կրկնուին: Անոնք բարձր տրամադրութեամբ բաժնուեցան սրահէն:
Այս ձեռնարկը իր բովանդակութեամբ ու նպատակի խորքով միաժամանակ հանդիսացաւ երախտագիտութեան ու յարգանքի պարգեւ` մեր մայրերուն, իսկ բարեսիրական բնոյթով` իրական օրհնութիւն մը հաստատութեան համար: Այսպիսի պահեր կը հաստատեն, որ սիրոյ, յարգանքի ու գուրգուրանքի ձայնը երբեք պէտք չէ լռէ, մանաւանդ երբ ան ուղղուած է մեր մոռցուած, բայց ոսկեայ սերունդին` մեր մայրերուն եւ մեր հայրերուն:
