6.09c
Երեվան
կրկ, ապր 06
Սահակեան-Նունեան միջնակարգ վարժարանի մէջ տեղի ունեցած է գիտական յատուկ գործունէութիւն մը՝ «Գիտական փորձերու օր», որ ձօնուած է վարժարանի լիսէի բաժնի նախկին տնօրէնուհի՝ հանգուցեալ Թալին Մաթոսօղլուի անթառամ յիշատակին։
Այս մասին «Արեւելք» իմացաւ Պոլսոյ «Նոր Մարմարա»էն, որ մասնաւորապէս կը գրէ՝
12 Մարտ 2025 Չորեքշաբթի՝ Սահակեան-Նունեան միջնակարգ վարժարանի մէջ տեղի ունեցաւ գիտական յատուկ գործունէութիւն մը՝ «Գիտութիւն, փորձ եւ զգայնութիւն՝ ընկերային կեանքի նկատմամբ» կարգախօսի ներքեւ։
Ձեռնարկը կը բաղկանար գիտական եւ ուսողութեան աշխատութիւններէն եւ փորձերէն, նաեւ բնապահպանութեան մասին պատրաստուած գծագրութիւններէն։ Այս բոլոր աշխատութիւնները ձօնուած էին վարժարանի լիսէի բաժնի նախկին տնօրէնուհի՝ հանգուցեալ Թալին Մաթոսօղլուի անթառամ յիշատակին։ Շատեր կը յիշեն որ ողբացեալ տնօրէնուհին հարազատ Սահակեանցի էր, Սահակեան Նունեան լիսէէ շրջանաւարտ ըլլալէ ետք, համալսարանի մէջ տարրաբանութեան ուսում ստացած եւ յետոյ 15 տարի պաշտօնավարած էր իր շրջանաւարտ լիսէին մէջ։
Ձեռնարկին իրենց մասնակցութիւնը բերին մեր հայ վարժարաններու Է. դասարանի սաները, որոնք ցուցադրեցին բնապահպանութեան մասին իրենց պատրաստած գծագիր աշխատութիւնը։ Անոնք ներկայ եղան նաեւ գիտական եօթը աշխատանոցներու, որոնք համեմուած էին փորձերով։
Օգտաշատ ձեռնարկի վերջաւորութեան՝ վարժարանի տնօրէնուհի՝ Ալին Եիւճէլ ուրախութիւն յայտնեց ի տես մասնակից վարժարաններու խանդավառութեան եւ գոհունակութեան, ըսաւ որ արդէն հասած են իրենց նպատակին, ոգեկոչելով նախկին տնօրէնուհի՝ Թալին Մաթոսօղլուի բարի յիշատակը։ Քոյր վարժարաններու տղաքը իրարու ծանօթացած, փորձեր կատարած եւ իրենց տեսակէտները պաշտպանած եւ պարզած էին։
Մասնակից բոլոր վարժարաններուն տրուեցան շնորհաւորագիրեր, որոնք տարբեր չափանիշերով արժեւորուած էին։ Դատակազմի անդամներն էին գիտութեան վաստակաշատ ուսուցչուհի՝ Արմենուհի Միրաշօղլու, գծագրիչ՝ Անէթ Սանտրա Աչըքկէօզ եւ «կրաֆիք»ի արուեստագէտ՝ Արտա Պօղոսեան։
