3.09c
Երեվան
երկ, դկտ 08
Պէյրութի մէջ, օրերս, հովանաւորութեամբ Հայկազեան համալսարանի նախագահ վեր. դոկտ. Փոլ Հայտոսթեանի, կազմակերպութեամբ «ԱՅԲ թու ԶԵՏ» (AYP to ZED) արուեստի ակադեմիայի հիմնադիրներ քոյր եւ եղբայր` Մարալ եւ Ժիրայր Փանոսեաններու, նշուած է «ԱՅԲ թու ԶԵՏ» (AYP to ZED) արուեստի ակադեմիայի 20-ամեակը. այդ առթիւ կազմակերպուած է հաւաքական ցուցահանդէսի մը՝ ակադեմիայի շրջանաւարտներու եւ հիմնադիրներու մասնակցութեամբ։
Այս մասին «Արեւելք» տեղեկութիւն քաղեց Պէյրութի մեր պաշտօնակից՝ «Ազդակ»էն։
Ստորեւ՝ թղթակցութիւնը ամբողջութեամբ։
Հովանաւորութեամբ Հայկազեան համալսարանի նախագահ վեր. դոկտ. Փոլ Հայտոսթեանի, կազմակերպութեամբ «ԱՅԲ թու ԶԵՏ» (AYP to ZED) արուեստի ակադեմիայի հիմնադիրներ քոյր եւ եղբայր` Մարալ եւ Ժիրայր Փանոսեաններու, մասնակցութեամբ օգնական կազմակերպող արուեստագէտներ Զիատ եւ Ծովիկ Ժրէյժ ամոլին, ակադեմիայի 20-ամեակին առիթով, 20 նոյեմբերին «Էսբաս Տատուր» ցուցասրահին մէջ բացումը կատարուեցաւ հաւաքական ցուցահանդէսի մը, որուն իրենց մասնակցութիւնը բերին 20 տարիներու ընթացքին աւարտած 89 շրջանաւարտներէն 46-ը` 83 գեղանկարներով: Իւրաքանչիւր շրջանաւարտ ցուցադրած էր երկու ստեղծագործութիւն` երկու տարբեր բնաբաններու շուրջ: Մարալ Փանոսեանին ընտրած բնաբաններէն առաջինը արուեստագէտները կը մղէր խորապէս անդրադառնալու կիներու ստանձնած շինիչ աշխատանքներուն, իրագործումներուն եւ դաստիարակչական մարզին մէջ իրենց ունեցած բացառիկ դերերուն, ինչպէս նաեւ` կիներու իրաւունքներուն:
Երկրորդ բնաբանը սիրոյ բազմազան դրսեւորումն էր, ինչպէս` վիպապաշտ, ընկերային, նաեւ սէր` հայրենիքի, ծնողաց, ընտանիքի, արդարութեան, բնութեան եւ այլն: Բոլոր աշխատանքները կը ներկայացնէին անձնական վերլուծումներ, որոնք կը դառնային ներշնչող: Ժիրայր Փանոսեանին առաջադրած նիւթերը ներշնչուած էին բանաստեղծութիւններէ, նաեւ` երաժշտական ու արուեստի այլ ստեղծագործութիւններէ: Երկրորդ բնաբանը արուեստագէտները հրաւիրած էր երեւակայելու եւ ըստ այնմ ներկայացնելու իրենց ապագայ արուեստանոցը, կամ ծաղիկներու գեղեցիկ համադրում մը` իրենց պատկերացումով: Յայտնենք, որ Մարալ եւ Ժիրայր Փանոսեաններ եւս` իւրաքանչիւրը երկու գործով, իրենց մասնակցութիւնը բերած էին ցուցահանդէսին:
Ցուցահանդէսի բացման խօսքը արտասանեց օրուան հանդիսավար, ակադեմիայի շրջանաւարտ Նաժուա Հարիք, որ անդրադարձաւ արուեստի կարեւորութեան` լուսարձակի տակ առնելով ակադամիայի 20-ամեայ գործունէութիւնը:
Վեր. դոկտ. Փոլ Հայտոսթեան իր խօսքին մէջ ողջունեց նախաձեռնութիւնները, որոնք կ՛իրագործուին անհատներու միջոցով, աւելցնելով, որ երբեմն անհատներ շատ մեծ իրագործումներ կ՛ընեն, եւ անկէ կ՛օգտուին ընկերութիւնն ու շրջապատը: Ան քաջալերեց եւ գնահատեց սոյն անհատական նախաձեռնութիւնը, որ կրցաւ գոյատեւել` 20 տարիներ Մարալ եւ Ժիրայր Փանոսեաններու յարատեւ աշխատանքով, գործին նկատմամբ անոնց ունեցած հաւատքով եւ ստեղծած բացառիկ մթնոլորտով: Վեր. Հայտոսթեան նորանոր յաջողութիւններ մաղթեց «ԱՅԲ թու ԶԵՏ» արուեստի ակադեմիայի յառաջիկայ նոր տարեդարձներու տեսլականով եւ յուշանուէրով մը պատուեց Փանոսեանները, որոնք իրենց կարգին յուշանուէր մը յանձնեցին անոր:
Այնուհետեւ ակադեմիայի 20-ամեակին առիթով պարգեւատրուեցան շարք մը անհատներ, որոնց պարգեւատրումը կատարեց նախկին նախարար Ժան Օղասապեան, որ իր կարգին երկու տարիէ ի վեր կ՛աշակերտէ ակադեմիային:
Առաջին հերթին, ցուցասրահի սեփականատէր Ապտալլա Տատուրի յիշատակը պատուելու համար եւ որպէս երախտագիտութիւն ակադեմիայի տարիներու աշխատանքի նկատմամբ իր մեծ գնահատանքին, ընտանիքին յանձնուեցաւ Տատուրի դիմանկարը, որ գործն էր շրջանաւարտ Վարագ Մանուկեանի: Ապա յուշանուէր մը յանձնուեցաւ Զիատ եւ Ծովիկ Ժրէյժ ամոլին` ցուցահանդէսի կազմակերպման աշխատանքներուն մէջ իրենց ունեցած ներդրումին համար: Յուշանուէր ստացան ակադեմիայի 15 տարուան օգնական ուսուցչուհի եւ հաշուապահ Անի Մանուկեան, նաեւ` շրջանաւարտ Նաժուա Հարիք, որ 15 տարիէ ի վեր կը վարէ բոլոր ցուցահանդէսները: Երկու տաղանդաւոր աշակերտներ` Տեսիլ Չէրթիտեան եւ Մարիօ Էլ Հըլու, ստացան արուեստագէտներու ծնողքին` Փայլակ եւ Աստղիկ Փանոսեաններու անունով հաստատուած մրցանակը` մէկ կիսամեակ ձրի կրթաթոշակ: 20-ամեակի առիթով 2 շրջանաւարտներ Քորին Սթֆեն եւ Սեւակ Տէր Կարապետեան ստացան «Outstanding future artist» տիտղոսը, ինչպէս նաեւ` որակաւոր նկարչութեան իրեր: Ծաղկեփունջեր յանձնուեցան` օգնական ուսուցչուհի Անի Տէր Կարապետեանին, նաեւ Ռոտա Եագուպին, Իզապէլ Տեկիրմենճեանին, Թամար Խանճիհանեանին` ցուցահանդէսի պատրաստութեան մէջ իրենց ներդրումին համար:
Աւարտին խօսք առաւ Մարալ Փանոսեանը, որ շնորհակալութիւն յայտնեց ակադեմիայի ծնողներուն, որոնք իրենց ունեցած ամէնէն թանկագին արժէքը` իրենց զաւակները կը վստահին իրենց, որոնք կը դառնան արուեստագէտներ: Ան շնորհակալական խօսք ուղղեց նաեւ ցուցասրահի սեփականատէրերուն, Փանոսեան մեծ ընտանիքին, նաեւ` բոլոր անոնց, որոնք սատար հանդիսացան ցուցահանդէսի կազմակերպման: Փանոսեան գոհունակութիւն յայտնեց, որ ակադեմիայի շրջանաւարտները տակաւին իրենց կապը պահած են ակադեմիայի հետ, դիտել տալով, որ հպարտ են իրենցմով, եւ յաջողութիւն մաղթեց բոլորին:
Սոյն ցուցահանդէսը արգասիքն է 20 տարիներու ստեղծագործական նուիրուածութեան, յարատեւութեան եւ լուրջ աշխատանքի, նաեւ կը ներկայանայ իբրեւ յարգանքի տուրք` ակադեմիային փոխանցած հարուստ ժառանգութեան` հաստատելով անոր բեղուն դերակատարութիւնը` որպէս արուեստի կեդրոնի, որ երկու տասնամեակներէ ի վեր կը ծաղկի գեղեցիկ ստեղծագործութիւններով:
