-9.91c
Երեվան
ուրբ, փտր 28
Նախագահութեամբ Ռաֆայէլ Պետրոս ԻԱ. Տանն Կիլիկիոյ կաթողիկէ հայոց կաթողիկոս պատրիարքին, մասնակցութեամբ միաբան եպիսկոպոսներու եւ աշխարհի տարբեր երկիրներէ ժամանած միաբաններու,Զմմառու Տիրամօր վանքին մէջ, 24 եւ 25 փետրուարի կայանալիք` Զմմառու պատրիարքական կղերի միաբանութեան մայրավանքի մեծաւորի, պատրիարքական փոխանորդի եւ վարչական հայրերու ընտրական ժողովը ընթացք առաւ երկուշաբթի, 24 փետրուար 2025-ի առաւօտեան ժամը 8:00-ին, վանքի «Փոխման Սուրբ Կուսին» մայր եկեղեցւոյ մէջ սուրբ եւ անմահ պատարագով, զոր մատուցեց մեծաւորի տեղապահ Պերճ վրդ. Սապէ:
Պատարագէն ետք ժողովականները եկեղեցւոյ մէջ մասնակցեցան հոգեւոր ամփոփումին, որուն զեկուցումը կատարեց հայր Ժան Քալաքեշ:
Կէսօրէ ետք ժամը 3:30-ին, «Արծիւեան» ժողովասրահին մէջ, նախագահութեամբ հոգեւոր տիրոջ ընտրական ժողովի բացումը յայտարարուեցաւ, ուր գումարուեցաւ անդրանիկ նիստը: Նախկին վարչականները ներկայացուցին իրենց ծաւալած աշխատանքին տեղեկագիրները:
Երկրորդ օրուան ընտրական ժողովին, իբրեւ Զմմառու Պատրիարքական կղերի միաբանութեան պատրիարքական փոխանորդ ընտրուեցաւ Մաշտոց ծ. վրդ. Զահթէրեան:
Միաբանական ընտրական Ժողովը ընտրեց նաեւ չորս վարչականներ` Նարեկ վրդ. Լուիսեան, Տիգրան վրդ. Փիլիպոսեան, Վարդան վրդ. Ճալլուֆեան եւ Կարապետ վրդ. Գլընճեան:
Աւարտին շնորհաւորանքները ընդունուեցան մայրավանքի եկեղեցւոյ մէջ, եկեղեցւոյ զանգակատունը բարձր ղօղանջեց աւետելով նոր մեծաւորի ընտրութիւնը:
