5.09c
Երեվան
շբթ, դկտ 21
Գանատա- 26 Յուլիս 2015-ին Համազգային Հայ Կրթական եւ Մշակութային Միութեան «Գլաձոր» եւ ՀՅԴ Գանատայի Երիտասարդական Միութեան «Սիմոն Զաւարեան» մասնաճիւղերու կազմակերպութեամբ տեղի ունեցաւ լրագրող-լուսանկարիչ՝ Սքաութ Թիւֆէնքճեանի «Հայկական սփիւռք» ծրագիրի ու վերջերս լոյս տեսած «Միայն աշխարհը կայ» գիրքի ներկայացումը՝ Թորոնթոյի Հայ Կեդրոնի Համազգային «Յ. Մանուկեան» Գրադարանին մէջ:Համազգային «Գլաձոր» եւ ՀՅԴ ԳԵՄ «Սիմոն Զաւարեան» մասնաճիւղերու անունով ողջոյնի խօսք կատարելէ ետք, հանդիսավար Ռուբէն Ճանպազեան հրաւիրեց Թիւֆէնքճեանը որ սալիկներու միջոցաւ ներկայացուց վերջին վեց տարիներու ընթացքին կատարած իր աշխատանքը:Թիւֆէնքճեան ծնած է Պոսթըն. հայրը ամերիկահայ է, իսկ մայրը իրլանտական ծագումով ամերիկացի։ Սքաութի հօրենական նախահայրերը կու գան Մուսա լեռէն:«Հայկական Սփիւռք» ծրագիրին ծիրին մէջ, Թիւֆէնքճեան այցելեց Եւրոպա, Լիբանան եւ մինչեւ Հնդկաստան, լուսանկարելու աշխարհի չորս կողմը գտնուող հայկական գաղթօճախները: Ծրագրին աւարտին ան հրատարակեց աւելի քան 160 լուսանկարներէ եւ 224 էջերէ բաղկացող «Միայն աշխարհը կայ» հատորը:Ներկայացման աւարտին, ներկաները առիթը ունեցան իրենց հարցումները ուղղելու Թիւֆէնքճեանին, որմէ ետք, Համազգային «Գլաձոր» մասնաճիւղի ատենապետուհի Մեղեդի Էթիեմեզեան տեղւոյն Համազգայինի եւ ՀՅԴ ԳԵՄ-ի մասնաճիւղերու անունով անոր նուիրեց Թորոնթոհայ լուսանկարիչ՝ Գալուստ Պապեանի «Ներաշխարհիս ոսպնեակէն» լուսանկարչական հատորը:Նշենք, որ Սքաութ Թիւֆէնքճեան 2008-ի Միացեալ նահանգներու նախագահական ընտրութիւններուն Պարաք Օպամայի լուսանկարիչն էր։ Օպամայի ընտրապայքարին ընթացքին ան լուսանկարեց աւելի քան 12 հազար լուսանկար եւ հետագային հրատարակեց լուսանկարչական ալպոմ մը՝ Yes We Can: Barack Obama's History-Making Presidential Campaign։
