10.09c
Երեվան
հնգ, նմբ 21
Լիբանանի մէջ Հայաստանի դեսպան Վահագն Աթաբեկեան «Արմենփրես»-ին հետ ունեցած զրոյցի ընթացքին ըսաւ, որ Լիբանանի մէջ իսրայէլեան գործողութիւններու իբրեւ հետեւանք` վիրաւորներուն ու զոհերուն մէջ հայեր չկան: Լիբանանի հայաբնակ շրջանները այս պահուն անմիջականօրէն վտանգուած չեն, ուստի ներկայիս տարհանում կազմակերպելու կարիք չկայ:
Դեսպանը նշեց, որ Հայաստանի դեսպանութիւնը մնայուն կապի մէջ է երկրի իշխանութիւններուն հետ, ինչպէս նաեւ, ըստ անհրաժեշտութեան, համայնքային կառոյցներուն հետ` Հայաստանի Հանրապետութեան քաղաքացիներու խնդիրներու` իր իրաւասութիւններու շրջագիծին մէջ պատշաճ հասցէագրման նպատակով:
30 սեպտեմբերին կատարուած զրոյցին ընթացքին դեսպանը դիտել տուաւ, որ ընդհանուր առմամբ, Լիբանանի մէջ հաւատարմագրուած դեսպանութիւններ մինչեւ տուեալ օրը իրենց քաղաքացիները չէ տարհանած. բոլոր երկիրները` որպէս կանոն, կը յորդորեն իրենց քաղաքացիները լքել երկիրը` օգտուելով օդանաւային ընթացիկ թռիչքներէն:
Լիբանանի մէջ Հայաստանի Հանրապետութեան դեսպանութիւնը կ՛աշխատի արտակարգ օրէնքի պայմաններու մէջ, հիւպատոսական ծառայութիւնը կը գործէ ամբողջ ծանրաբեռնուածութեամբ` սպասարկելու համար Հայաստանի Հանրապետութեան քաղաքացիներու կարիքները, կը գործէ Հայաստանի Հանրապետութեան արտաքին գործոց նախարարութեան թէժ գիծը: Ան նշեց, որ դեսպանութիւն դիմած Հայաստանի Հանրապետութեան այն քաղաքացիները, որոնց անձնագիրը չէ վաւերացուած, վերադարձի վկայական կը տրուի անվճար:
«Օգտուելով առիթէն` անգամ մը եւս կը յորդորենք Հայաստանի Հանրապետութեան քաղաքացիները ժամանակաւորապէս խուսափիլ Լիբանան այցելութիւններէն, եթէ խիստ անհրաժեշտութիւն չկայ», նշեց Աթաբեկեան:
Խօսելով լիբանանեան-իսրայէլեան սահմանին վրայ տեղակայուած ՄԱԿ-ի խաղաղապահներու կազմին մէջ Հայաստանի Հանրապետութեան զօրախումբին մասին` դեսպանը ըսաւ, որ անոնց հետ դեսպանութեան եւ ռազմական կցորդի կապը պարբերական է, դուրս են թիրախաւորման գօտիներէն եւ իրենց առաքելութիւնը կ՛իրականացնեն ապահով պայմաններու մէջ:
