8.09c
Երեվան
ուրբ, նմբ 08
Արցախի Հանրապետութեան մայրաքաղաք Ստեփանակերտի Ս. Աստուածածին առաջնորդանիստ եկեղեցւոյ մէջ 9 մայիսին տեղի ունեցած է հոգեհանգստեան կարգ՝ ի յիշատակ Հայրենական մեծ պատերազմին, Արցախեան առաջին, Ապրիլեան եւ 44-օրեայ պատերազմներուն նահատակուած հերոսներուն։ Տեղեկութիւնը յայտնած է «Արմէնփրէս»։
Հոգեհանգստեան կարգէն յետոյ Պաշտպանութեան բանակի հովանաւոր Ս. Գրիգորիսի խաչվառի առաջնորդութեամբ մեկնարկած է խաչերթ դէպի Ստեփանակերտի յուշահամալիր:
Երիտասարդներն իրենց ձեռքը պահած են 44–օրեայ պատերազմին զոհուած հերոսներու լուսանկարները։
Յիշեցնենք, որ մայիս 9-ը հայութեան համար տարիներ շարունակ եռատօն եղած է` Հայրենական մեծ պատերազմի (1941–1945) խորհրդային ժողովուրդներու տարած յաղթանակի, Արցախի պաշտպանութեան բանակի ստեղծման եւ 1992-ի Շուշիի ազատագրման օրը: Շուշին, սակայն, կորսնցուցինք 2020–ի նոյեմբերին արցախեան 44–օրեայ պատերազմին կրած ցաւալի պարտութեան հետեւանքով։
Ինչ կը վերաբերի Հայրենական մեծ պատերազմին` Հայկական Խորհրդային Սոցիալիստական Հանրապետութենէն մօտ 300 հազար մարդ մեկնած է ռազմաճակատ։ Այդ կը կազմէր բնակչութեան աւելի քան 20 տոկոսը։ Աւելի քան 200 հազար հայեր ալ այլ հանրապետութիւններէն զօրակոչուած են ռազմաճակատ։
Հայաստանը տուած է ՀԽՍՀ 150 հերոս, 80 զօրավար, 5 մարշալ եւ մէկ ծովակալ։
Պատերազմի ընթացքին զոհուած է աւելի քան 200 հազար հայ զինուոր։
