2.09c
Երեվան
ուրբ, մրտ 07
Հաւաքական անվտանգութեան պայմանագրի կազմակերպութիւնը (ՀԱՊԿ) կը շարունակէ աշխատանքային կապերը Երեւանի հետ, եւ կազմակերպութեան պարտաւորութիւնները Հայաստանի նկատմամբ կը պահպանուին։ Այս մասին յայտարարած է Հաւաքական անվտանգութեան պայմանագրի կազմակերպութեան (ՀԱՊԿ) ընդհանուր քարտուղար Իմանկալի Թասմակամպեթովը։
«Մենք աշխատանքային կապեր կը պահպանենք Երեւանի հետ։ Կ՚ուզեմ անգամ մը եւս շեշտել, որ Հայաստանի Հանրապետութիւնը կը մնայ դաշնակից, եւ կազմակերպութեան պարտաւորութիւնները երկրի նկատմամբ կը մնան։ Ինչ կը վերաբերի Հաւաքական անվտանգութեան պայմանագրի կազմակերպութեան (ՀԱՊԿ) հետ համագործակցութիւնը վերսկսելու պատրաստակամութեան ազդանշաններուն, ապա յարաբերութիւններու ձեւաչափը չէ փոխուած եւ կը մնայ նոյնը»,-ըսած է Թասմակամպեթովը։
Հայաստանը սառեցուցած է իր մասնակցութիւնը Հաւաքական անվտանգութեան պայմանագրի կազմակերպութեան (ՀԱՊԿ) 2024 թուականի փետրուարին։
Վարչապետ Նիկոլ Փաշինեանը յայտարարած է, որ Հաւաքական անվտանգութեան պայմանագրի կազմակերպութիւնը (ՀԱՊԿ) սպառնալիքներ կը ստեղծէ Հայաստանի անվտանգութեան, հետագայ գոյութեան, ինքնիշխանութեան եւ պետականութեան համար։
Հաւաքական անվտանգութեան պայմանագրի կազմակերպութեան (ՀԱՊԿ) հետ յարաբերութիւնները սրած են 2022-ի սեպտեմբերին Հայաստանի ինքնիշխան տարածք Ատրպէյճանի զինուժի ապօրինի ներխուժումէն ետք։ Հակառակ Երեւանի պահանջներուն՝ Հաւաքական անվտանգութեան պայմանագրի կազմակերպութիւնը (ՀԱՊԿ) մինչեւ օրս չէ դատապարտած դաշինքի անդամ Հայաստանի դէմ այդ յարձակումը եւ չէ արձանագած, որ Ատրպէյճանը Հայաստանէն տարածքներ բռնագրաւած է։
