34.04c
Երեվան
շբթ, օգս 01
Գիւմրիի երիտասարդութեան կրթական, մշակութային եւ հասարակական զարգացման ծառայող «Շիրվանեան» երիտասարդական կեդրոնը կը նշէ իր հիմնադրութեան 10-ամեակը։ Յոբելենական տարեշրջանին առիթով նախատեսուած են «Ամարաս» ցերեկային ճամբարը, «Մինա Շիրվանեան» կրթաթոշակի ծրագիրը եւ յատուկ տօնակատարութիւն մը, որուն ընթացքին պիտի մեծարուին կեդրոնի առաքելութեան նեցուկ կանգնած նուիրատուները, կամաւորներն ու գործընկերները։
Վերջին տասը տարիներուն, «Շիրվանեան» երիտասարդական կեդրոնը կրթութեան, ղեկավարման ու կամաւոր ծառայութեանց զարգացման եւ մշակութային ժառանգութեան պահպանութեան միջոցաւ կը կերտէ Գիւմրիի երիտասարդ սերունդը։ Իր հիմնադրութեան տասնամեակը նշելով, կեդրոնը ղեկավարող «Մենք Ենք Գիւմրին» յանձնախումբը հպարտութեամբ կը տօնէ այս կարեւոր հանգրուանը՝ 2026ի ամառնային «Ամարաս» ցերեկային ճամբարով, 2026–2027 կրթական տարեշրջանի «Մինա Շիրվանեան» կրթաթոշակի ծրագրի դիմումները ընդունելով, ինչպէս նաեւ յատուկ տօնակատարութեամբ, որուն ընթացքին պիտի մեծարուին տեսլական ունեցող այն անհատները, նուիրատուները, կամաւորներն ու գործընկերները, որոնց նուիրուածութիւնը հազարաւոր երիտասարդներու կեանքերը փոխակերպելու մէջ վճռորոշ դեր ունեցած է։
2016ին իր դռները բանալէն ի վեր, կեդրոնը դարձած է Գիւմրիի կարեւոր կրթական եւ մշակութային հաստատութիւններէն մէկը։ Վերջին տասը տարիներուն ան ծառայած է աւելի քան 5000 երեխաներու եւ երիտասարդներու, կազմակերպած է աւելի քան 300 կրթական ու մշակութային ծրագիր, իրականացուցած է 20է աւելի ամառնային ճամբարներ, ընդունած է աւելի քան 1000 արցախցի երեխաներ, Շիրակի մարզի համալսարանական ուսանողներուն շնորհած է 100է աւելի կրթաթոշակ, համախմբած է 500 կամաւորներ, որոնք միասնաբար աւելի քան 15,000 ժամ համայնքային ծառայութիւն մատուցած են, հաստատած է 100է աւելի գործընկերութիւններ եւ կեանքի կոչած է 50է աւելի կրթական, արուեստի եւ հմտութիւններու զարգացման նախաձեռնութիւններ։ Այն, ինչ սկիզբ առաւ Հայաստանի երիտասարդութեան մէջ ներդրում կատարելու տեսլականով, այսօր վերածուած է մնայուն շարժումի, որ կը շարունակէ հզօրացնել համայնքները եւ նոր հնարաւորութիւններ ստեղծել ապագայ սերունդներուն համար։
Յոբելենական տօնակատարութեան ընթացքին նաեւ պիտի կատարուի «Մարկըրիթ Եուրէճեան» սրահի անուանակոչութիւնը, որ իրականութիւն դարձած է տէր եւ տիկին Ճեք եւ Զարիկ Եուրէճեաններու առատաձեռն նուիրատուութեամբ, ի յիշատակ Ճեք Եուրէճեանի մօր։ Իր կեանքը կարեկցանքով եւ ծառայութեամբ բնորոշուած այս բացառիկ կինը տարիներ շարունակ աջակցած է Գիւմրիի ընտանիքներուն՝ 1988ի Սպիտակի երկրաշարժէն ետք, ապահովելով կենսական օգնութիւն, բնակարան եւ յոյս՝ անոնց, որոնք ամէն ինչ կորսնցուցած էին։ Ան ապրեցաւ «Սէրը գործին մէջ» սկզբունքով, արժէք մը, որ կը շարունակէ ներշնչել իր ընտանիքին բարեսիրական գործունէութիւնը՝ ներառեալ բնակարանաշինութեան նախաձեռնութիւնները, համալսարանական կրթաթոշակները, գիւղական զարգացման ծրագիրները եւ Հայաստանի տարածքին կրթական հնարաւորութիւններու ընդլայնումը։ «Մենք Ենք Գիւմրին» նախաձեռնութեան երկարամեայ աջակիցները հանդիսացող Եուրէճեան ընտանիքը նշանակալի ներդրում ունեցած է «Շիրվանեան» կեդրոնին առաքելութեան յառաջխաղացման եւ հայ երիտասարդներուն համար նոր առիթներու ստեղծելու գործին մէջ։
«Շիրվանեան» կեդրոնը այսօր կը գործէ իր բազմաթիւ բարերարներուն բացառիկ առատաձեռնութեան շնորհիւ։ Անոնց շարքին, նախ կը յիշատակուին հանգուցեալ Յակոբ եւ Մինա Շիրվանեանները, որոնց ամբողջ կեանքին ընթացքին կրթութեան եւ մշակութային վերելքին նկատմամբ ունեցած նուիրումը ներշնչեց կեդրոնի հիմնադրութիւնը։ Անոնց անունով կոչուած կեդրոնը կը շարունակէ զարգանալ անոնց դստեր՝ Ալիս Պետրոսեանի եւ անոր ամուսնոյն՝ Վահիկ Պետրոսեանի անսակարկ նուիրուածութեան շնորհիւ։ Անոնց շարունակական առաջնորդութիւնն ու աջակցութիւնը վճռորոշ դեր ունեցած են կեդրոնի յարատեւ յաջողութեան մէջ։ Վահիկ եւ Ալիս Պետրոսեանները կեդրոնի ամենահաւատարիմ հովանաւորներէն են, նպաստելով անոր ազդեցութեան ընդլայնման եւ ապահովելով, որ Շիրվանեան ընտանիքի տեսլականը շարունակէ հարստացնել հայ երիտասարդներու սերունդներու կեանքը։
2016ի Յուլիս 11ին, ՀՅԴ Արեւմտեան Ամերիկայի Կեդրոնական կոմիտէի «Մենք Ենք Գիւմրին» նախաձեռնութեան միջոցով հիմնադրուած «Շիրվանեան» երիտասարդական կեդրոնը ստեղծուեցաւ այն համոզումով, որ կրթուած, հասարակական կեանքին մէջ ներգրաւուած եւ ազգային արժէքներով առաջնորդուող երիտասարդութիւնը հզօր Հայաստանի հիմնաքարն է։ Իր գործունէութիւնը ծաւալելով պատմական վերանորոգուած շէնքի մը մէջ, որ ծանր վնասներ կրած էր 1988ի Սպիտակի երկրաշարժին ընթացքին, կեդրոնը այսօր վերածուած է վերածնունդի, դիմացկունութեան եւ յոյսի կենսունակ խորհրդանիշի՝ միաժամանակ հանդիսանալով Հայաստանի եւ Սփիւռքի միջեւ ամուր ու իմաստալից կամուրջ մը։
Կեդրոնին մէջ այս տարի տեղի կ՛ունենայ «Ամարաս 2026»ը՝ տարեկան ամառնային ցերեկային ճամբարը, որուն անունը ներշնչուած է Արցախի պատմական Ամարասի վանքէն, ուր Սուրբ Մեսրոպ Մաշտոց հիմնեց առաջին հայկական դպրոցը։ Ծրագիրը հարիւրաւոր երեխաներ եւ պատանիներ կը համախմբէ խորքային եւ հարուստ փորձառութեան մը շուրջ, որ կեդրոնացած է հայկական ինքնութեան, պատմութեան, ղեկավարման, համայնքային ծառայութեան, բնապահպանական պատասխանատուութեան, արուեստի եւ խմբային աշխատանքի վրայ։ Միաժամանակ, ընթացքի մէջ են 2026–2027 ուսումնական տարեշրջանի «Մինա Շիրվանեան» անուանական կրթաթոշակի ծրագրի հարցազրոյցները։ Ծրագիրը նիւթական աջակցութիւն կը տրամադրէ համալսարանական եւ արհեստագիտական ուսումնական հաստատութիւններու ուսանողներուն՝ միաժամանակ խրախուսելով ակադեմական բարձր յաջողութիւն, քաղաքացիական գերգրգռուածութիւն եւ կամաւոր ծառայութիւն։
Մինչ «Շիրվանեան» երիտասարդական կեդրոնը կը թեւակոխէ իր երկրորդ տասնամեակը, անիկա կը շարունակէ անշեղօրէն հաւատարիմ մնալ իր առաքելութեան՝ կրթելու, ոգեշնչելու եւ հզօրացնելու հայ ղեկավարներու յաջորդ սերունդը։ Այսօր երիտասարդներուն մէջ կատարուած ներդրումով, կեդրոնը կը շարունակէ ամրապնդել Հայաստանի ապագան՝ միաժամանակ պահպանելով այն արժէքները, ինքնութիւնն ու ազգային ոգին, որոնք կը բնորոշեն հայ ժողովուրդը։
