Բարերար Գաբրիէլ Չէմպէրճեանի նոր նեցուկը. Բացումը կատարուած է ուսանողական տարրալուծարանի

Բարերար Գաբրիէլ Չէմպէրճեանի  նոր նեցուկը. Բացումը կատարուած է ուսանողական տարրալուծարանի

Ուշագրաւ  նախաձեռնութեամբ մը հանդէս գալով  ազգային բարերար  Գաբրիէլ  Չէմպէրճեան սատարած է «Պոլիտեխնիկ»ի  Աւագ Վարժարանի    ուսանողական տարրալուծարանի հիմնման։

Այս մասին տեղեկութիւնը ստացանք նոյնանուն համալսարանի Դեկան՝ Գոռ Վարդանեանի  դիմատետրեան էջէն, ուր մասնաւորապէս կը գրէ՝    

Պոլիտեխնիկի հոգաբարձուներու խորհուրդի նախագահ Տիգրան Աւինեանի, բարերար Գաբրիէլ Չէմպէրճեանի եւ ոլորտի մասնագէտներու հետ Պոլիտեխնիկի աւագ դպրոցին մէջ բացումը կատարեցինք բնագիտութեան տարրալուծարանի:

Շնորհաւորելով բոլորը, միջոցառման ներկայ մասնագիտական համայնքի անունով շնորհակալութիւն յայտնած եմ պարոն Գաբրիէլ Չէմպէրճեանին Պոլիտեխնիկական համալսարանի Աւագ դպրոցին մէջ նմանօրինակ տարրալուծարանի ստեղծման գործով ունեցած գործուն աջակցութեան համար։ 

Տարածքն ամբողջութեամբ վերանորոգուած, կահաւորուած եւ տարրալուծարանային սարքաւորումներով համալրուած է պարոն Չէմպէրճեանի ֆինանսաւորման շնորհիւ։ 

Այս ձեռքբերում է ոչ միայն Պոլիտեխնիկական համալսարանի, այլեւ բնագաւառի զարգացման համար, քանզի այս դպրոցին մէջ կրթութիւն կը ստանան փայլուն երիտասարդներ, որոնք ապագային պիտի դառնան ոչ միայն ճարտարագէտներ, այլեւ բնագէտներ, ֆիզիկոսներ, մաթեմաթիկոսներ, իսկ մեր ապագան կախուած է երկրաչափական, արհեստագիտական, բնագիտական կրթութիւնէն։ 

Հանրակրթութեան նկատմամբ Պոլիտեխնիկի Հոգաբարձուներու խորհուրդի եւ պոլիտեխնիկական մեծ ընտանիքի վերաբերմունքը առանձնակի է, քանզի մենք միշտ բարձրագոյն կրթութեան յաջողութիւնը կապած ենք հանրակրթութեան մէջ ունեցած յաջողութիւններուն հետ։

Անոր ապացոյցն այն է, որ Պոլիտեխնիկը իր թիւ 6-րդ մասնաշէնքն ամբողջութեամբ տրամադրած է Աւագ դպրոցին։ Այսօր կ'իրականացուին վերանորոգման համապատասխան աշխատանքներ, որպէսզի մեր աշակերտները լաւագոյն միջավայրի մէջ ստանան իրենց կրթութիւնը եւ բարձրագոյն կրթութեան ապագան կապեն Պոլիտեխնիկի, ոլորտային, մասնագիտական կրթութեան հետ, հայրենիքի մէջ գիտական եւ նորարարական արդիւնքներ ստեղծելու համար։ Իւրաքանչիւր կրթական միջավայրի մէջ անհրաժեշտ պայմանը հնարաւորութիւններն են, առաւել եւս բնագիտութեան մէջ։

Ամիսներ առաջ հնարաւորութիւն ունեցանք պարգեւատրելու մեր աշակերտները միջազգային ողիմպիադին արձանագրած յաջողութիւններու համար: Այսօր ալ վստահ եմ, որ մեր աշակերտները այս նոր հնարաւորութիւնէն լաւագոյնս կ'օգտուին ողիմպիական յաջողութիւնները կրկնապատկելու եւ ոսկեայ մետալներու տեսքով հայրենիք բերելու համար։

Միջոցառման ընթացքին ականատես եղանք մեր աշակերտներու կողմէ բնագիտական փորձերու իրականացման:

Նշեմ` որոշ ժամանակ առաջ Համաշխարհային դրամատան ֆինանսաւորմամբ Կրթական ծրագրերու իրականացման կեդրոնի կողմէ մեզի տրամադրուած էր բնագիտական տարրալուծարանային սարքերու եւս մէկ խմբաքանակ: