9.09c
Երեվան
շբթ, ապր 20
Արցախի շուրջ տեղի ունեցող քաղաքական գործընթացների համատեքստում վերջին զարգացումները, մասնաւորապէս Ռուբէն Վարդանեանի պաշտօնանկութիւնը, հակառակ ներկայացուած բացատրութիւն-հիմնաւորումների, բազմաթիւ հարցերի ու մտահոգութիւնների տեղիք է տալիս: Հանրային տրամադրութիւնների անտեսմամբ եւ առանց դերակատար քաղաքական ուժերի համախոհութեան նման որոշման կայացումը, անկախ դրդապատճառներից, ինքնին անընդունելի է:
Խնդիրն այն է, թէ Արցախի դիմադրողականութեան առումով որքանո՛վ է կայացուած որոշումը ճիշդ: Ի սկզբանէ յայտնի էր, որ պետնախարարի պաշտօնում Ռուբէն Վարդանեանի նշանակումը թէ՛ Ազրպէյճանում, թէ՛ Հայաստանի ու Արցախի որոշակի շրջանակների մօտ լուրջ հակազդեցութեան էր արժանանալու: Այդպէս էլ եղաւ, երբ ալիեւեան բռնապետութիւնն ու Հայաստանի իշխանութիւնը միաժամանակ ճնշում բանեցրին Արցախի վրայ, որպէսզի Ռուբէն Վարդանեանը հեռացուի պաշտօնից:
Այս կացութիւնը անընդունելի է եւ մեծագոյն հարուած` Արցախի Հանրապետութեան ներքին անհրաժեշտ կուռ միասնականութեանը:
Հակառակ իրողութիւններին, հնարաւոր էր դարձել Արցախում դրական տեղաշարժէր արձանագրել` յոյսն ու պայքարի ոգին անաղարտ պահելով. վերջին ամիսներին արցախահայութեան դրսեւորած տոկունութիւնն ու կամքը արժանացել էին համահայկական գնահատանքի:
Այդ յոյսը յաղթանակների վերածելու գործում բոլորս անելիք ունենք: Նպատակների ու դրանց հասնելու միջոցների յստակ ձեւակերպման ամենօրեայ հետեւողական աշխատանքը, որքան էլ դժուար, անարդիւնք չի կարող մնալ: Հակառակ ներքին ու արտաքին դաւադիր ծրագրերի, հայութեան արժանապատուութեան եւ լինելիութեան պայքարը պէտք է շարուակուի:
ՀՅԴ-ն հաւատում է Հայաստան-Արցախ-Սփիւռք եռամիասնութեան ուժին եւ շարունակելու է իր բոլոր հնարաւորութիւններով նպաստել դիմադրութեան ու պայքարի գործին:
ՀՅԴ ԲԻՒՐՕ
28 Փետրուար 2023
