8.09c
Երեվան
հնգ, փտր 26
Ազգային Ժողովի «Հայաստան» խմբակցութեան պատգամաւորներ Աննա Գրիգորեանը, Արթուր Խաչատրեանը, Գեղամ Մանուկեանն ու Քրիսթինէ Վարդանեանը յայտարարութեամբ հանդէս եկած են․
«Ս․թ․ օգոստոսի 27-ին Հանրային հեռուստաընկերութեան կողմից հեռարձակուած հարցազրոյցում ԱԳ նախարար Արարատ Միրզոյեանը յայտարարեց, թէ, իբր, Ադրբեջանի հետ քննարկուող պայմանագրի նախագծում երբեւէ չի դրուել կոնկրետ քարտէզ ամրագրելու հարցը։ Նա նոյնիսկ հեգնանքով հարցնում է՝ «ի՞նչպէս պէտք է խաղաղութեան համաձայնագրում քարտէզ լինէր»։
Պաշտօնապէս յայտարարում ենք․ Արարատ Միրզոյեանը ստում է։
Նախաստորագրուած փաստաթղթի համաձայնեցման գործընթացում հայկական կողմը ներկայացնողների առաջարկներում սահմանազատման եւ սահմանագծման հիմք էր առաջարկւում ընդունել 1974-1979 թուականների խորհրդային ԳՇ քարտէզները։ Ադրբեջանական կողմն առաջարկում էր ընդհանրական ձեւակերպում` առանց յստակ թուականների քարտէզների ամրագրման:
Ինչպէս երեւում է նախաստորագրուած փաստաթղթի հրապարակուած տեքստից՝ Հայաստանը զիջել է նաեւ այս կէտում՝ ընդունելով Ադրբեջանի հերթական պահանջը:
Սա նշանակում է՝ ՀՀ սահմանի յստակ ուրուագիծ փաստաթղթով չի ամրագրուել։ Այս փաստը եւս մէկ անգամ ցոյց է տալիս․
- բանակցութիւններն ընթանում են Ադրբեջանի պահանջների ամբողջական բաւարարման տրամաբանութեամբ,
- Հայաստանի ներկայացուցիչները չեն արձանագրել որեւէ ձեռքբերում, որը կը պաշտպանէր մեր երկրի տարածքային ամբողջականութիւնը։
Այս յայտարարութիւնը հերքելու միակ տարբերակը բանակցուած բոլոր փաթեթների ամբողջական հրապարակումն է։ Այդ դէպքում կը բացայայտուի ներկայիս բանակցային «խմբի» ամբողջական թշվառութիւնը։
Գործող վարչախմբի նպատակը երբեք հայանպաստ ձեւակերպումներ ապահովելը չի եղել։ Նրանց միակ նպատակը Ադրբեջանի պահանջների լեգիտիմացումն է եւ ժողովրդի աչքին այլընտրանքի բացակայութեան պատրանք ստեղծելը։
Սա է իշխանութեան էութիւնը՝ ստել, մոլորեցնել եւ հիմնաւորել Ադրբեջանի պահանջները»։
