5.09c
Երեվան
երկ, ապր 14
Վերջին շրջանում մամուլում արծարծվում է Հայաստանում պոլսահայ աշխարհահռչակ լուսանկարիչ Արա Գյուլերի աշխատանքների թանգարան հիմնելու հարցը: Թեման հատկապես արդիական դարձավ այն ժամանակ, երբ թուրքական մամուլը շրջանառության մեջ դրեց մի լուր, ըստ որի Արա Գյուլերը պայմանագիր է կնքել թուրքական մի ընկերության հետ` իր արխիվը հանձնելու համար, այնուհետև, կրկին ըստ թուրքական լրատվամիջոցների, չեղյալ է հայտարարվել համաձայնությունը: Չնայած լուրերը տարածել էին թուրքական հայտնի լրատվամիջոցները, Արա Գյուլերը հետագա օրերին հերքեց այդ տեղեկատվությունը:
Մեր հարցումներին ի պատասխան, Հայաստանի մշակույթի նախարարությունից հայտնեցին, որ Երևանում Արա Գյուլերի լուսանկարների թանգարան հիմնելու հարցով զբաղվում է Մշակույթի նախարարությունը, և այժմ Երևանում հարմար տարածք են փնտրում` այդ գաղափարն իրականացնելու համար: ՀՀ մշակույթի նախարարի տեղակալ Ներսես Տեր-Վարդանյանն «Արեւելքին» ասաց, որ նման ցանկություն հայտնվել է Արա Գյուլերի և Մշակույթի նախարարության պաշտոնյաների հանդիպման ժամանակ, ընդ որում` Երևանում Գյուլերի թանգարան ունենալու ցանկությունը եղել է երկկողմանի: «Խոսքը գնում է առանձին շենքում թանգարան հիմնելու մասին, իսկ մինչև հարմար շենք գտնելը, մենք Գյուլերի ստեղծագործությունների` Ազգային պատկերասրահում բացված ժամանակավոր ցուցադրությունը դարձրինք մշտական, և այսօր Հայաստանի գլխավոր պատկերասրահի մի ամբողջ հարկ տրամադրված է Արա Գյուլերի լուսանկարներին»,-ասաց Ներսես Տեր-Վարդանյանը, նշելով, որ դրանք թե' բնանկարներ են, թե' դիմանկարներ և թե' Գյուլերի` տարբեր երկրներում արված հայտնի լուսանկարներից: Թվով 160 լուսանկարները, ինչպես հաստատեց Մշակույթի փոխնախարարը, Արա Գյուլերը նվիրել է Հայաստանին: Հենց դրանք էլ ցուցադրվելու են առաջիկայում բացվելիք թանգարանում, որի հիմնման ժամկետների մասին փոխնախարարը դժվարացավ որևէ բան ասել. «Երբ որ հարմար շենք գտնվի, արդեն հնարավոր կլինի խոսել ժամկետների մասին»:
Մշակույթի նախարարությունը մշտական կապի մեջ է վարպետի հետ, վստահեցրեց մեր զրուցակիցը, և մեր այն հարցին, թե Գյուլերը ցանկություն ունի՞ իր արխիվից այլ լուսանկարներ ևս նվիրելու, նա պատասխանեց. «Տեղյակ ենք, որ նա հայտնել է նման ցանկություն, Մշակույթի նախարարությունն էլ հայտնել է իր պատրաստակամությունը, և եթե նվիրի, սիրով կընդունենք, նոր ցուցանմուշների առկայության պարագայում էլ պատրաստ ենք ցուցադրության փոփոխություն անել, թեմատիկ դարձնել կամ պարբերաբար փոփոխել»:
Իսկ ինչ պայմաններով է ձեռք բերվելու շենքը, ըստ Ներսես Տեր-Վարդանյանի, կդիտարկվի այն ժամանակ, երբ թանգարանի վերածելու շենքը կոնկրետ ընտրված լինի, այդ դեպքում կորոշվի ձեռք բերման միջոցները` գնում, վարձակալություն կամ օգտագործման այլ հիմունքներ:
