-0.91c
Երեվան
երք, փտր 11
Լիբանանահայ ներհուն մտաւորական Արա Արծրունի այսօր պարգեւատրուած է Մեծի Տանն Կիլիկիոյ Կաթողիսկոսութեան կողմէ: Պարգեւատրման հանդիսութեան ներկայ եղած են գաղութի ազգային, մտաւորական եւ թատերական գործիչներ, այն տեղի ունեցած է Անթիլիասի Վեհարանին մէջ, ուր յաւուր պատշաճի միջոցառման աւարտին Ն.Ս.Օ.Տ.Տ. Արամ Ա. Կաթողիկոս Արա Արծրունին պարգեւատրած է Կիլիկիոյ Կաթողիկոսութեան բարձրագոյն՝ «Ս.Մեսրոպ Մաշտոց» շքանշանով: Վեհարանին մէջ եղած հանդիսութեան ընթացքին խօսք առած են լիբանանահայ մտաւորականներ՝ Ժիրայր Դանիէլեան եւ Կարօ Յովհաննէսեան: Վեհափառ Հայրապետի կողմէ շքանշանի տուչութեան սրբատառ կոնդակը ընթերցած է Տ. Մեղրիկ եպս. Բարիքեան:
Խօսքով հանդէս եկած է Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա. Կաթողիկոս ու նաեւ մեծարեալը՝ Արա Արծրունի:
Հանդիսութեան ներկայ եղած են մեծարեալին կինը՝ Տիկ. Ռիթա Արծրունի եւ կրտսեր որդին՝ Սեւակ Արծրունի:
Լիբանանահայ գրական եւ հասարակական կեանքէն ներս իր ուրոյն տեղը ունեցող Ա. Արծրունի երկար տարիներ կարեւոր եւ ազդեցիկ դեր ունեցած է գաղութի մշակութային կեանքին մէջ:
Որպէս հրապարակագիր, թատերագիր եւ մանաւանդ յախուռն կեցուածքներով հանդէս եկող մտաւորական ան կը հանդիսանայ պէյրութահայ իրաւ մտաւորականութեան ռահիվիրան: Արծրունի հեղինակ է տասնեակ գործերու եւ արդի թատրոնի գործերու իր ստորագրութեամբ կ'առանձնացուի, որպէս ուրոյն եւ դիմագիծ կերտած հեղինակ մը:
Նոյնը կարելի է ըսել Ա. Արծրունիի կերտած հրապարախօսութեան մասին: Ան երկար տարիներ աշխատակցած է Պէյրութի «Ազդակ»ին, «Բագին»ին, «Արծիւ»ին, «Կամար»ին եւ տասնեակ այլ թերթերու եւ իր անկեղծ ու ճշմարտախօս խօսքով դարձած է սփիւռքի ամէնէն վաւերական գրողներէն մին:
Արա Արծրունիի գրական-հասարակական գործունէութեան տակաւին կ'անդրադառնանք:
Լուսանկարները ՝ Արամ Սոմունճեանի
